Psalmen 129

Fan bern ôf oan hawwe se my faak beneare,

– moat Israel sizze –

₂fan bern ôf oan hawwe se my faak beneare,

mar se koenen my net oer.

₃Ploegers hawwe my de rêch teploege,

se hawwe lange fuorgen lutsen,

₄mar de Heare, dy’t rjochtfeardich is,

hat de stringen fan ’e sûnders lossnien.

₅Allegearre dy’t Sion haatsje

sille te skande stean en tebekskrilje.

₆Se sille wêze as gers op ’e dakken,

dat al fertoarret, ear’t it der ôflutsen wurdt;

₇dêr’t de meaner gjin hânfol fan garret

en de skeavebiner gjin earmfol.

₈Net ien foarbygonger sil tsjin har sizze:

De segen fan ’e Heare wês mei jimme!

Wy segenje jim yn ’e namme fan ’e Heare!