Genesis 5

₁Dit is de list fan Adams geslacht. De deis dat God Adam makke, hat Er him makke nei Gods gelikenis. ₂Manlik en froulik hat Er har skepen en Hy hat har segene en har de deis dat se skepen waarden, de namme ‘minske’ jûn.

₃Doe’t Adam 130 jier libbe hie, krige er in soan, syn gelikens en syn byld en hy neamde him Set. ₄Neidat er Set krige hie, libbe Adam noch 800 jier en hy krige soannen en dochters. ₅Dat de dagen dat Adam libbe, wienen mei-inoar 930 jier en doe is er stoarn.

₆Set hie 105 jier libbe, doe’t er Enosj krige. ₇Neidat er Enosj krige hie, libbe Set noch 807 jier en hy krige soannen en dochters. ₈Dat de dagen fan Set wienen mei-inoar 912 jier en doe is er stoarn.

₉Enosj hie 90 jier libbe, doe’t er Kenan krige. ₁₀Neidat er Kenan krige hie, libbe Enosj noch 815 jier en hy krige soannen en dochters. ₁₁Dat de dagen fan Enosj wienen mei-inoar 905 jier en doe is er stoarn.

₁₂Kenan hie 70 jier libbe doe’t er Mahalaleël krige. ₁₃Neidat er Mahalaleël krige hie, libbe Kenan noch 840 jier en hy krige soannen en dochters. ₁₄Dat de dagen fan Kenan wienen mei-inoar 910 jier en doe is er stoarn.

₁₅Mahalaleël hie 65 jier libbe, doe’t er Jêred krige. ₁₆Neidat er Jêred krige hie, libbe Mahalaleël noch 830 jier en hy krige soannen en dochters. ₁₇Dat de dagen fan Mahalaleël wienen mei-inoar 895 jier en doe is er stoarn.

₁₈Jêred hie 162 jier libbe, doe’t er Henoch krige. ₁₉Neidat er Henoch krige hie, libbe Jêred noch 800 jier en hy krige soannen en dochters. ₂₀Dat de dagen fan Jêred wienen mei-inoar 962 jier en doe is er stoarn.

₂₁Henoch hie 65 jier libbe, doe’t er Metûsjelach krige. ₂₂Henoch libbe neidat er Metûsjelach krige hie, noch 300 jier ticht by God en hy krige soannen en dochters. ₂₃Dat de dagen fan Henoch wienen mei-inoar 365 jier. ₂₄No hie Henoch tichte by God libbe en hy wie der net mear, mei’t God him weinommen hie.

₂₅Metûsjelach hie 187 jier libbe, doe’t er Lamech krige. ₂₆Neidat er Lamech krige hie, libbe Metûsjelach noch 782 jier en hy krige soannen en dochters. ₂₇Dat de dagen fan Metûsjelach wienen mei-inoar 969 jier en doe is er stoarn.

₂₈Lamech hie 182 jier libbe, doe’t er in soan krige. ₂₉Hy neamde him Noäch en sei: Dizze sil ús treaste fanwegen ús wrotten en wramen, fanwegen de grûn, dêr’t de Heare de flok op lein hat. ₃₀Neidat er Noäch krige hie, libbe Lamech noch 595 jier en hy krige soannen en dochters. ₃₁Dat de dagen fan Lamech wienen mei-inoar 777 jier en doe is er stoarn.

₃₂Noäch wie 500 jier. En doe krige er Sem, Cham en Jafet.