Genesis 23

₁Sara is hûndert-sânentweintich jier âld wurden. Dat wienen Sara har libbensjierren. ₂En doe is Sara stoarn te Kirjat Arba – dat is Hebron – yn it lân Kanaän en Abraham gong nei binnen om de rouklacht oer har te hâlden en har te beskriemen. ₃Doe gong Abraham oerein, by syn ferstoarne wei, en hy prate mei de Hetiten en sei: ₄Ik wenje hjir by jimme as frjemdling, mar jou my no in eigen grêf by jimme, dan kin ik myn ferstoarne útdrage en begrave. ₅Mar de Hetiten antwurden Abraham en seinen tsjin him: ₆Harkje nei ús, mynhear. Jo binne yn ús fermidden in foarst fan God. Begraaf jo ferstoarne mar yn it bêste grêf dat wy ha. Gjinien fan ús dy’t jo syn grêf wegerje sil om jo ferstoarne te begraven. ₇Doe gong Abraham stean en hy makke in bûging foar de Hetiten, de bewenners fan it lân, ₈en hy sei tsjin har: As it jimme tinken is dat ik myn ferstoarne útdrage en begrave kin, harkje dan nei my en doch in goed wurd foar my by Efron, de soan fan Sochar, ₉dat er my de grot fan Machpela jout. Dy is sines en dy leit op ’e râne fan syn lân. Lit er my dy jaan foar de folle priis ta in eigen grêf yn jimme fermidden. ₁₀No siet Efron dêr ek by de Hetiten. Dat Efron de Hetyt antwurde Abraham yn it bywêzen fan alle Hetiten dy’t yn ’e poarte fan har stêd kommen wienen: ₁₁Welnee, mynhear, harkje ris nei my: Dat fjild jou ik jo en de grot dy’t dêr yn is, dy jou ik jo ek. Yn it bywêzen fan myn lânslju haw ik jo dy jûn. Begraaf jo ferstoarne mar. ₁₂Doe makke Abraham in bûging foar it folk fan it lân ₁₃en hy sei tsjin Efron, yn it bywêzen fan it folk fan it lân: Och, wol sa goed wêze en harkje nei my. Ik jou jo de priis dy’t it lân wurdich is. Nim dat no fan my oan, dan kin ik myn ferstoarne dêr begrave. ₁₄Doe antwurde Efron Abraham en sei tsjin him: ₁₅Mynhear, harkje nei my. Lân fan fjouwerhûndert sikkel sulver, wat hat dat no foar jo en my te betsjutten. Begraaf jo ferstoarne mar. ₁₆En Abraham harke nei Efron en hy woech him it jild ôf, dat er yn it bywêzen fan ’e Hetiten neamd hie: fjouwerhûndert sulversikkels, sa’t dy yn ’e hannel gongber wienen. ₁₇Sa krige Abraham it stik lân fan Efron dat yn Machpela leit, east fan Mamré, yn eigendom, it lân mei de grot dêryn en alle beammen yn it hiele gebiet dêr omhinne ₁₈yn it bywêzen fan ’e Hetiten en fan allegearre dy’t yn ’e stedspoarte kommen wienen.

₁₉Dêrop begroef Abraham syn frou Sara yn ’e grot yn it stik lân fan Machpela, east fan Mamré, dat is Hebron yn it lân Kanaän. ₂₀Sa krige Abraham fan ’e Hetiten dat stik lân mei de grot dêryn ta in eigen grêf.