2 Kroniken 17

₁Syn soan Josjafat folge him op. Dy makke him sterk tsjin Israel. ₂Hy lei soldaten yn alle festingsstêden fan Juda en wachtposten yn it lân Juda en yn ’e stêden fan Efraïm dy’t syn heit Asa ynnommen hie. ₃De Heare stie Josjafat by, want hy hâlde de wegen dy’t syn heit yn it earstoan gien wie, en socht it net by de Baäls. ₄Mar hy socht it by de God fan syn heit; Dy syn geboaden hâlde er him oan en hy die net sa’t se yn Israel dienen. ₅De Heare joech Josjafat de keningsmacht fêst yn hannen en hiele Juda brocht him skatting, dat rykdom en eare foelen him yn oerfloed ta. ₆Mei in moedich hert gong er fierder op ’e wegen fan de Heare, dat hy romme ek de offerhichten en wijpeallen yn Juda op. ₇Yn it tredde jier fan syn regear stjoerde er syn foarmannen Benchaïl, Obadja, Sekarja, Netanel en Mikaja derop út om yn ’e stêden fan Juda ûnderrjocht te jaan. ₈En mei harren de leviten Sjemaja, Netanja, Sebadja, Asahel, Sjemiramot, Jonatan, Adonia, Tobia en Tob-Adonia; en mei dy leviten de prysters Elisjama en Joaram. ₉Dy joegen ûnderrjocht yn Juda mei it wetboek fan de Heare derby. Se gongen alle stêden fan Juda bylâns en joegen it folk ûnderrjocht. ₁₀Doe kaam de skrik foar de Heare deryn by alle keninkryken fan ’e lannen dy’t om Juda hinne leinen, dat se makken gjin oarloch mei Josjafat.

₁₁Fan ’e Filistinen brochten ek guon Josjafat geskinken en sulver as skatting; sels de Arabieren brochten him lytsfee: 7700 rammen en 7700 geitebokken. ₁₂Sa waard Josjafat geandewei in tige grut man en hy boude yn Juda stinzen en opslachstêden ₁₃en hy hie yn ’e stêden fan Juda gâns foarrieden en yn Jeruzalem in leger fan fikse kearels. ₁₄Se wienen neffens har stamhuzen yndield. Fan Juda wienen oanfierders oer tûzenskippen: Adna mei 300.000 man ûnder him, fikse kearels, ₁₅njonken him Jochanan mei 280.000 man ûnder him, ₁₆njonken him Amasja, de soan fan Sikry, dy’t him frijwillich yn tsjinst fan ’e Heare steld hie, mei 200.000 man ûnder him, fikse kearels. ₁₇Fan Benjamin wienen oanfierders: Eljada, in fikse kearel mei 200.000 man ûnder him, wapene mei bôge en skyld, ₁₈njonken him Jozabad mei 180.000 man ûnder him, ree foar de striid. ₁₉Dat binne de mannen dy’t yn tsjinst fan ’e kening stienen, it folk dat de kening yn ’e festingstêden fan Juda set hie, net meiteld.