1 Korintiërs 16

₁Wat de kollekte foar de hilligen oanbelanget: jimme moatte it krekt sa dwaan, as ik foar de gemeenten fan Galatië beöardere haw. ₂Alle sneinen moat elk fan jimme safolle achterút lizze en bewarje as him barre mei. Oars soe der pas kollekteard wurde nei myn komst. ₃As ik by jimme kom, sil ik minsken dy’t jimme dêr geskikt foar achtsje mei brieven stjoere, om jimme jefte nei Jeruzalem te bringen. ₄En as it de muoite wurdich is dat ik sels ek gean, kinne se mei my reizgje. ₅Ik sil by jimme komme nei myn reis troch Masedoanië. Want dêr gean ik op trochreis lâns. ₆By jimme sil ik, as it kin, langer bliuwe en faaks wol de winter oer; jimme kinne my dan fierder helpe, wêr’t ik ek hinne gean mei. ₇Ik wol jimme no net efkes op trochreis treffe; ik hoopje in tiid lang by jimme te bliuwen, as de Hear it talit. ₈Oant Pinkster sil ik yn Efeze bliuwe, ₉want de doar stiet dêr wiid iepen om mei frucht te arbeidzjen en der binne ek gâns tsjinstanners.

₁₀Mar as Timóteüs komt, soargje dan, dat er him by jimme thús fielt; hy docht ommers it wurk fan de Hear, krektlyk as iksels; ₁₁net ien mei him dus behannelje as wie er gjin tel. Help him yn frede fierder om by my te kommen, want ik ferwachtsje him mei de bruorren. ₁₂Wat ús broer Apollos oanbelanget: ik haw der tige by him op oanstien, dat er mei de bruorren nei jimme ta gean soe, mar hy fielde der neat foar om no al te gean; hy sil gean as it him útkomt.

₁₃Wês wach, stean fêst yn it leauwen, wês manmoedich en sterk. ₁₄Jimme moatte alles wat jim dogge mei leafde dwaan.

₁₅No fersykje ik jimme noch ien ding, bruorren, en dat is dit: jimme witte, dat Stefanas en syn húshâlding de earste bekearlingen fan Achaje binne en dat se harsels yn tsjinst fan ’e hilligen steld hawwe. ₁₆Jou jimme dan ûnder sokken del en ûnder elk, dy’t mei har arbeidet en him ynspant. ₁₇Ik bin bliid, dat Stefanas, Fortunatus en Achaïcus by my binne om te fergoedzjen, dat ik jimme mis. ₁₈Hja hawwe my opfleure en jimme ek. Hâld sokke lju yn eare.

₁₉De gemeenten fan Asia dogge jimme de groetenis. Hertlike groetenis yn de Hear fan Aquila en Priska mei de gemeente by har oan hûs. ₂₀Alle bruorren dogge jimme de groetenis. Groetsje elkoarren mei de fredegroet. ₂₁Mei eigen hân skriuw ik: ‘De groetenis fan Paulus’. ₂₂As immen de Hear net leaf hat, de flok oer him. Maranata – Hear fan ús, kom dochs! ₂₃De genede fan de Heare Jezus wês mei jimme! ₂₄Myn leafde is mei jim allegearre yn Kristus Jezus.