Psalmen 70
Bea om help
1Foar de dirigint. Fan David. By it betinkingsoffer.
2O God, rêd my,
kom mei hasten, Heare, om my te helpen.
3Lit beskamme en foar skande stean
dy’t it op myn libben fersjoen hawwe.
Lit beskamme tebekskrilje
dy’t kwea tsjin my yn ’t sin hawwe.
4Lit se har omkeare fan skamte
dy’t sizze: Moai sa! Krekt goed!
5Mar lit optein wêze en har bliid meitsje om Jo
allegearre dy’t Jo sykje;
en dy’t fan Jo rêding begeare,
lit dy altyd sizze: Grut is de Heare.
6En ik, earme en ellindige, –
o God, kom mei hasten by my!
7Myn Helper en Rêder binne Jo,
Heare, bliuw net wei.
© 1978 Nederlands Bijbelgenootschap
