Psalmen 66

Jubelje foar God, do hiele ierde,

₂besjong de gloarje fan syn namme,

meitsje der in prachtige lofsang op.

₃Lit elkenien tsjin God sizze:

Wat binne jo dieden ûntsachlik.

Om jo geweldige krêft dogge jo fijannen

Jo sabeare hulde.

₄De hiele ierde moat foar Jo bûge,

foar Jo sjonge en jo namme loovje.sela

₅Kom en sjoch Gods dieden,

dy’t yn syn dwaan ûntsachlik is foar de minsken.

₆Hy hat de see droech lein,

dat hja koenen mei droege fuotten oerstekke;

dêrom binne wy sa bliid yn Him

₇dy’t altyd mei krêft hearsket.

Syn eagen geane oer de folken,

de rebellen hoege net yn opstân te kommen.sela

₈Folken, priizje ús God,

lit lûd syn lof wjerklinke.

₉Dy’t ús libben de romte

joech en ús fuotten net wifkje liet.

₁₀Want hifke, God, ha Jo ús wol,

ús lottere as it sulver.

₁₁Jo hawwe ús yn it fangnet jage,

ús swiere lêsten op ’e heupen lein,

₁₂minsken oer ús holle ride litten,

wy moasten troch fjoer en troch wetter,

mar Jo hawwe ús yn ’e romte laat.

₁₃Ik kom yn jo hûs mei brânoffers,

ik betelje Jo de beloften

₁₄dy’t ik sels tasein haw,

dy’t ik beloofd haw, doe’t ik yn need siet.

₁₅Brânoffers fan fette skiep wol ik bringe,

tagelyk mei de offerreek fan rammen;

bollen en bokken offerje ik.

₁₆Kom hjir, allegearre dy’t ûntsach hawwe foar God,

harkje, ik wol fertelle

wat Hy foar my dien hat.

₁₇Amper hie ik de mûle opdien,

of ik moast Him al loovje.

₁₈Hie myn hert kwea yn ’t sin hân,

dan hie de Heare net nei my harke.

₁₉Mar no hat God al harke

en acht jûn op myn gebed.

₂₀Heech te priizjen is God,

dy’t myn gebed net ôfwiisd

en my syn geunst net ûntkeard hat.