Psalmen 149

₁Halleluja.

Sjong foar de Heare in nij liet,

syn lof yn ’e gemeente fan syn geunstelingen.

₂Lit Israel bliid wêze om syn Skepper,

lit de bern fan Sion jubelje om har Kening.

₃Lit har syn namme huldigje mei dûnsjen,

lit har by tromme en liere foar Him psalmsjonge.

₄Want de Heare hat tige mei syn folk op,

Hy kroanet de ellindigen mei de oerwinning.

₅Lit de geunstelingen jubelje yn gloarje,

lit har jubelje yn har legerkampen,

₆de mûle fol fan Gods lofprizingen

en in twasnedich wapen yn ’e hân.

₇Wraak oefenje ûnder de folken,

ferjilding ûnder de naasjes,

₈har keningen mei kettings bine,

har foarname lju mei izeren boeiens,

₉it beskreaune fonnis oan har útfiere –

dat is de eare foar al syn geunstelingen.

Halleluja.