Johannes 15

₁Ik bin de echte druvebeam en myn Heit is de hofker. ₂Elke rank oan My, dy’t gjin frucht jout, dy hellet Er derút en elke rank dy’t al frucht jout, suveret Er, dat dy namste mear frucht jaan mei. ₃No binne jimme al suver troch it wurd dat Ik tsjin jimme sein haw. ₄Bliuw dan mei My ferbûn, lykas Ik mei jimme. Lykas de rank út himsels gjin frucht jaan kin, as er net oan ’e druvebeam bliuwt, sa kinne jimme it likemin, as jimme net mei My ferbûn bliuwe. ₅Ik bin de druvebeam, jimme de ranken. Dy’t yn My bliuwt, lykas Ik yn Him, dy jout gâns frucht, want bûten My om kinne jimme neat dwaan. ₆Dy’t net mei My ferbûn bliuwt, wurdt fuortsmiten lykas de rank en ferwilet; men fandelet se by inoar en smyt se yn it fjoer en dan ferbrâne se. ₇As jimme mei My ferbûn bliuwe en oan myn wurden fêsthâlde, freegje dan, wat jimme mar wolle en jimme sille it krije. ₈Dêr wurdt myn Heit mei eare, (dat) jimme gâns frucht jouwe en dan sille jimme myn learlingen wêze.

₉Lykas myn Heit my leafhân hat, sa haw Ik jimme leafhân, hâld dan oan myn leafde fêst. ₁₀As jimme dogge wat Ik jimme opdroegen haw, sille jimme yn myn leafde bliuwe, lykas Ik ek dien haw wat myn Heit My opdroegen hat en oan syn leafde fêsthâld. ₁₁Dit haw Ik jimme sein, dat myn blydskip jimmes wêze soe en jimme troch alles hinne bliid wurde soenen.

₁₂Dit draach Ik jimme op, dat jimme inoar leafhawwe sille, lykas Ik jimme leafhân haw. ₁₃Grutter leafde as dizze hat net ien: dat ien syn libben weijout foar syn freonen. ₁₄Jimme binne myn freonen, as jimme dogge wat Ik jimme opdraach. ₁₅Ik neam jimme gjin slaven langer, want in slaaf wit net wat syn hear docht; Ik haw jimme freonen neamd, want, wat Ik fan myn Heit heard haw, dat haw Ik jimme allegearre bekend makke. ₁₆Jimme hawwe My net útsocht, Ik haw jimme útsocht en jimme oanwiisd om hinne te gean en frucht te jaan, frucht dy’t duorje kin, dat myn Heit jimme sadwaande alles jaan mei, wat jimme Him yn myn namme freegje. ₁₇Dit draach Ik jimme op, dat jimme inoar leafhawwe sille.

₁₈As de wrâld jimme hatet, betink dan dat dy My earder hate hat as jimme. ₁₉As jimme fan ’e wrâld wienen, soe de wrâld it wol goed miene mei wat by har heart; mar omdat jimme net by de wrâld hearre, mar Ik jimme útsocht haw út ’e wrâld, dêrom hatet de wrâld jimme. ₂₀Tink om wat Ik tsjin jimme sein haw; de slaaf stiet net boppe syn Hear. Hawwe se My ferfolge? Dan sille se jimme ek ferfolgje. Hawwe se myn wurd achtslein? Dan sille se jimmes ek achtslaan. ₂₁Lykwols al dy dingen sille se jimme oandwaan om My, omdat se Him net kenne, dy’t My stjoerd hat. ₂₂As Ik net kommen wie en net tsjin harren sprutsen hie, soenen se gjin skuld hawwe; no kinne se har skuld net goedprate. ₂₃Dy’t My hatet, hatet ek myn Heit. ₂₄As Ik net yn har fermidden dien hie wat gjinien oars dien hat, soenen se gjin skuld hawwe; mar no hawwe se dat sjoen en dochs hawwe se My en myn Heit beide hate. ₂₅Mar sa moat it wurd neikomme, dat yn har wet beskreaun stiet: ‘Se hawwe my sûnder reden hate!’

₂₆As de Helper komt, dy’t Ik jimme by myn Heit wei stjoere sil, de Geast fan ’e wierheid, dy’t by myn Heit wei komt, sil dy oer My getuge; ₂₇jimme moatte èk getuge, omdat jimme al fan it begjin ôf by My binne.