Hebreeërs 13

₁Hâld der net mei op elkoar as bruorren en susters yn Kristus leaf te hawwen. ₂Tink derom, gastfrij te wêzen; want dêrtroch hawwe guon oan ingels ûnderdak jûn, sûnder dat se it wisten. ₃Tink om har dy’t yn it tichthús sitte, as wienen jimme sels yn ’e boeiens slein. Tink om har dy’t mishannele wurde, om’t jimme sels ek in lichem hawwe.

₄Lit it houlik by allegearre yn eare wêze en man en frou inoar trou bliuwe; want dy’t ûnseedlik libje en de trou brekke, sil God sels oardielje.

₅Libje net as ien dy’t fûl op jild is, wês tefreden mei wat jimme hawwe. God sels hat ommers sein: Ik sil dy noait allinne litte, Ik gean noait by dy wei. ₆Wy kinne dêrom fol betrouwen sizze:

₇Ferjit jimme foargongers net, dy’t jimme it wurd fan God brocht hawwe. Hâld foar eagen hoe’t har libben ôfrint: nim har leauwen as foarbyld.

₈Jezus Kristus is juster en hjoed deselde en yn der ivichheid.

₉Lit jimme net op ’e doele bringe troch allerhanne frjemde learingen. Want it is goed, dat it herte sterk makke wurdt troch de genede fan God en net troch regels oer iten; wa’t it dêryn sykje, hawwe der neat mei bedijd. ₁₀Wy hawwe in alter dêr’t de tsjinners fan ’e tinte neffens rjocht net fan ite meie. ₁₁Want de hegepryster bringt it bloed fan ’e offerbisten yn it hillichdom om de sûnden te fermoedsoenjen. Mar de lichems wurde ferbrând bûten it legerkamp. ₁₂Dêrom hat ek Jezus bûten de (stêds)poarte lit, om it folk mei syn eigen bloed te hilligjen. ₁₃Lit ús dan nei Him ta gean, bûten it legerkamp en syn smaad meidrage. ₁₄Want wy hawwe hjir net in stêd dy’t bliuwt, mar wy sykje al weroan de stêd fan ’e takomst.

₁₅Lit ús dêrom troch Jezus oanienwei ús lof as offer bringe oan God, te witten de hulde fan lippen dy’t foar Him útkomme. ₁₆Ferjit net om goed te dwaan en mei elkoar te parten, want dat binne de offers dy’t God oansteane.

₁₇Harkje nei jimme foargongers en jou jim ûnder har del. Want sy steane nacht en dei noed fan jimme heil om’t se dêr rekkenskip fan jaan moatte. Soargje dat se dat mei blydskip dwaan meie en net al suchtsjendewei, want dat soe jimme gjin fertuten dwaan.

₁₈Bid foar ús. Wy binne der wis fan, dat wy in suver gewisse hawwe, want wy besykje ús yn alle ding ta deugd oan te stellen. ₁₉Nammerste mear freegje ik jimme om foar my te bidden, dat ik nammerste earder oan jimme weromjûn wurde mei.

₂₀De God dy’t frede jout, hat ús Hear Jezus út ’e deaden werombrocht, de hoeder fan ’e skiep, dy’t grut is troch syn dea, dêr’t Er in ivich ferbûn mei fersegele hat. ₂₁Mei dy God jimme yn steat stelle ta alle goeds, om te dwaan wat Hy wol en yn ús wurkje wat Him oanstiet, troch Jezus Kristus. Oan Him mei de gloarje wêze yn der ivichheid. Amen.

₂₂Ik freegje jimme, bruorren, nim dit wurd fan fermoanning goed op, want it is mar in koarte brief dy’t ik jimme stjoer.

₂₃Jimme moatte witte, dat ús broer Timóteüs loslitten is. Sa gau’t er komt, sil ik mei him jimme opsykje.

₂₄Doch de groetenis oan al jimme lieders en alle mei-kristenen.

De bruorren út Italië dogge jimme de groetenis.

₂₅Mei de genede mei jimme allegearre wêze.