Kolossers 1

₁Fan Paulus, apostel fan Kristus Jezus troch Gods wil, en fan ús broer Timóteüs ₂oan Gods folk yn Kolosse, ús leauwige bruorren yn Kristus: genede en frede mei jimme jûn wurde fan God ús Heit.

₃Wy bringe altiten tank oan God, de Heit fan ús Hear Jezus Kristus, sa faak wy foar jimme bidde. ₄Want wy hawwe heard fan jimme leauwen yn Kristus Jezus en fan ’e leafde dy’t jimme hawwe foar Gods hiele folk. ₅Dy beide hawwe jimme om’t jim hoopje op it heil dat foar jimme weilein is yn ’e himel. Dêr hawwe jimme earder al fan heard doe’t de tiding oer de wierheid, it bliid boadskip, ₆ta jimme kaam. Yn ’e hiele wrâld draacht dat boadskip frucht en wreidet him út, lykas dat by jimme gien is sûnt de deis dat jimme fan Gods genede heard hawwe en dy kennen leard hawwe sa’t dy yn wierheid is. ₇Sa hawwe jimme it leard fan ús bêste Epafras, ek in tsjinstfeint, dy’t as in trouwe tsjinner fan Kristus ús helpt. ₈Hy hat ús ek ferteld fan ’e leafde dêr’t de Geast jimme ta oanset hat.

₉Dêrom dogge wy gjin lichten, mar bidde foar jimme sûnt de deis dat wy dat heard hawwe. Wy freegje God dat Er jimme de folsleine kennisse fan syn wil witte lit, mei alle wysheid en ynsjoch dy’t de Geast jout. ₁₀Dan sille jimme sa libje lykas dat de Hear takomt en Hy dat graach sjocht, frucht drage yn allerhanne goed wurk en oanwinne yn jimme kennisse fan God. ₁₁Dat jimme sa sterke wurde meie troch de macht fan syn hearlikheid, om alles te fernearen en te ferdragen ₁₂en om mei freugde de Heit te tankjen dy’t jimme weardich achte hat om in oandiel te hawwen yn it erfskip fan ’e hilligen yn it ryk fan it ljocht. ₁₃Hy hat ús út ’e macht fan ’e tsjusternis helle en ús oerbrocht yn it keninkryk fan syn leave Soan. ₁₄Troch Him hawwe wy de ferlossing, de ferjouwing fan ’e sûnden.

₁₅Hy is it byld fan ’e ûnsjenbere God, de earstberne fan ’e hiele skepping.

₁₉Want God sels hat syn hiele wêzen yn Him wenje litte wollen ₂₀en troch Him alles wer mei Himsels fermoedsoenje wollen, wat op ’e ierde en wat yn ’e himel is. God hat frede sletten troch it bloed dat syn Soan oan it krús stoart hat.

₂₁Ek jimme stienen ienris fier fan God ôf en stienen as fijannen foar Him oer lykas út jimme ferkearde dieden wol bliken die. ₂₂Mar no hat God jimme wer ta Him brocht yn Kristus syn lichem fan fleis en bloed, troch syn dea, om jimme yn syn eagen hillich en sûnder lek of brek te meitsjen. ₂₃Mar dan moatte jimme wol fêst bewoartele bliuwe yn it leauwen en jimme net ôfbringe litte fan ’e hope dêr’t it bliid boadskip fan sprekt. Dat bliid boadskip hawwe jimme heard en it is ferkundige oan alle skepsel op ierde. Dêr bin ik, Paulus, in tsjinstfeint fan wurden.

₂₄Op dit stuit bin ik bliid dat ik foar jimme lije mei en ik folje troch it lijen yn myn ierdsk bestean oan, wat der noch mankearret oan ’e benearingen fan Kristus foar syn lichem, dat is de tsjerke. ₂₅Fan dy tsjerke bin ik in tsjinstfeint wurden neffens de opdracht, dy’t God my foar jimme jûn hat om syn wurd yn al syn rykdom bekend te meitsjen. ₂₆Dat is de ferburgenheid dy’t yn alle ieuwen en salang’t der minsken west ha, bedutsen bleaun is, mar dy’t no oan al Gods hilligen bekend makke is. ₂₇God woe har te witten dwaan, hoe’n wûndere hearlikheid dy ferburgenheid ynhat ûnder de heidenfolken. Dit is de ferburgenheid: Kristus is yn jimme, Hy, de hope op ’e hearlikheid. ₂₈Him ferkundigje wy. Wy fermoanje en leare elkenien yn alle wysheid om elkenien folslein te meitsjen yn Kristus. ₂₉Dêr wrot en wraam ik foar. Sa wurket Gods krêft mei macht yn my.