1 Keningen 15

₁Yn it achttjinde jier fan kening Jerobeäm, de soan fan Nebat, waard Abíam kening oer Juda. ₂Hy hat trije jier te Jeruzalem regearre en syn mem hiet Maäka, dochter fan Abisjalom. ₃Hy libbe yn alle sûnden dy’t syn heit foarhinne dien hie en syn hert wie net folslein oan ’e Heare, syn God, tawijd, lykas it hert fan syn foarfaar David. ₄Mar om David joech de Heare, syn God, him in lampe te Jeruzalem, mei’t Er nei him in soan komme liet en Jeruzalem steande hâlde. ₅Want David hie dien, sa’t de Heare it hawwe woe, en hy wie al syn libbensdagen net ôfwykt fan al wat Er him hjitten hie; behalven dan yn ’e saak fan Oería, de Hetyt. ₆It hat ek syn libben lang oarloch west tusken Rechabeäm en Jerobeäm.

₇It fierdere fan ’e skiednis fan Abíam, alles wat er dien hat, dat stiet wol beskreaun yn it boek fan ’e kroniken fan ’e keningen fan Juda. It wie oarloch tusken Abíam en Jerobeäm. ₈En Abíam is rêst mei syn foarfaars en se begroeven him yn ’e Davidsstêd en syn soan Asa folge him op.

₉Yn it tweintichste jier fan kening Jerobeäm fan Israel waard Asa kening oer Juda ₁₀en hy hat ienenfjirtich jier kening west te Jeruzalem. Syn mem hiet Maäka, dochter fan Abisjalom. ₁₁Asa die sa’t de Heare it hawwe woe, lykas syn foarfaar David. ₁₂Hy jage de wijde ûntuchtigen it lân út, romme alle ôfgodsbylden dy’t syn foarfaars makke hienen, út ’e wei; ₁₃ja, syn mem Maäka sette er sels as hearskeresse ôf, om’t se in walchlik byld foar Asjeara makke hie. Asa houde dat skandlike byld yn stikken en ferbaarnde it yn ’e delling fan ’e Kidron. ₁₄De offerhichten lykwols rekken net oan ’e kant. Mar it hert fan Asa hat syn libben lang folslein tawijd west oan ’e Heare. ₁₅De wijjeften fan syn heit en dy fan himsels brocht er yn it hûs fan de Heare: sulver, goud en allerhanne oar guod.

₁₆It wie oarloch tusken Asa en kening Basa fan Israel, salang as hja regearre hawwe. ₁₇Kening Basa fan Israel wie op Juda losgien en hie Rama fersterke, dat der koe by kening Asa fan Juda gjinien it lân út of yn. ₁₈Dêrop naam Asa alle sulver en goud dat der noch oer wie yn ’e skatkeamers fan ’e timpel en it paleis en joech it syn tsjinners oer. Dy stjoerde kening Asa nei Benhadad, de soan fan Tabrimmon, de soan fan Chesjion, de kening fan Aram, te Damaskus, mei it fersyk: ₁₉Der bestiet in ferbûn tusken jo en my, tusken jim heit en ús heit. Sjoch, ik stjoer jo in geskink yn sulver en goud. Ferbrek jo ferbûn no mei kening Basa fan Israel, dat er syn leger werom ropt. ₂₀Benhadad harke nei kening Asa en stjoerde syn legerkommandanten op ’e stêden fan Israel los en oermastere Ijjon, Dan, Abel-Bet-Maäka en hiele Kinnerot mei it hiele lân Naftaly. ₂₁Doe’t Basa dat hearde, joech er de fersterking fan Rama oer en gong werom nei Tirsa. ₂₂No liet kening Asa hiele Juda opkomme, sûnder ien frij te stellen. De stien en it hout, dêr’t Basa Rama mei fersterke hie, hellen se op en dêr fersterke kening Asa Geba-yn-Benjamin en Mispa mei.

₂₃It fierdere fan ’e skiednis fan Asa, al syn dappere dieden, wat er dien hat, en de stêden dy’t er fersterke hat, dat stiet wol beskreaun yn it boek fan ’e kroniken fan ’e keningen fan Juda. Dit noch: Op syn âlde dei krige er it oan ’e fuotten. ₂₄En Asa is rêst mei syn foarfaars. Hy waard by syn foarfaars begroeven yn ’e stêd fan syn foarfaar David. En syn soan Josjafat folge him op.

₂₅Nadab, de soan fan Jerobeäm, waard kening oer Israel, yn it twadde jier fan kening Asa fan Juda. Hy hat twa jier oer Israel regearre, ₂₆en die net sa’t de Heare it hawwe woe. Hy gong de wei fan syn heit en libbe yn ’e sûnde dêr’t dy Israel ta brocht hie.

₂₇Basa, de soan fan Achía, út it hûs Issaskar, makke in gearspanning tsjin him en Basa deade him te Gibbeton, dat oan ’e Filistinen hearde, yn ’e tiid dat Nadab mei hiele Israel Gibbeton belegere. ₂₈Basa hat him yn it tredde jier fan kening Asa fan Juda deade en waard sels kening foar him yn ’t plak. ₂₉Hy wie noch mar amper kening, of hy roege de hiele famylje fan Jerobeäm út. Hy liet Jerobeäm net ien oer, dy’t sykhelje koe; hy fermoarde se, krekt sa’t de Heare troch syn tsjinner Achía fan Sjilo sprutsen hie. ₃₀It wie om ’e sûnden dy’t Jerobeäm sels bedreaun hie en dêr’t er Israel ta brocht hie, en dêr’t er de Heare, de God fan Israel, sa slim mei terge hie.

₃₁It fierdere fan ’e skiednis fan Nadab, al wat er dien hat, dat stiet wol beskreaun yn it boek fan ’e kroniken fan ’e keningen fan Israel. ₃₂It hat oanienwei oarloch west tusken Asa en kening Basa fan Israel.

₃₃It tredde jiers fan kening Asa fan Juda, waard Basa, de soan fan Achía, kening oer hiele Israel, en hy regearre fjouwerentweintich jier. ₃₄Hy die net sa’t de Heare it hawwe woe. Hy gong de wei fan Jerobeäm en libbe yn ’e sûnde dêr’t dy Israel ta brocht hie.