1 Johannes 5

₁Elk dy’t leaut, dat Jezus de Messias is, is in bern fan God, en elk dy’t de Heit leafhat, hat ek syn bern leaf. ₂Hjir witte wy oan, dat wy de bern fan God leafhawwe, as wy God leafhawwe en nei syn geboaden libje. ₃Want dit is de leafde ta God: dat wy ús oan syn geboaden hâlde. En syn geboaden binne net swier, ₄want al wat yn God syn oarsprong fynt, oerwint de wrâld. Hjir oerwinne wy de wrâld mei: mei ús leauwen. ₅Wa oars is it dy’t de wrâld oerwint as dy’t leaut, dat Jezus de Soan fan God is?

₆Hy is it dy’t kommen is troch wetter en bloed, Jezus Kristus; net inkeld mei wetter, nee mei wetter en bloed. En de Geast is it dy’t getúcht, want de Geast is de wierheid. ₇Want der binne trije dy’t getuge: ₈de Geast en it wetter en it bloed, en dy trije komme mei-inoar oerien. ₉As wy it getugenis fan minsken al oannimme, it getugenis fan God waacht noch swierder, want dat is it getugenis dat God jûn hat oer syn Soan. ₁₀Dy’t yn ’e Soan fan God leaut, hat dat getugenis yn himsels. Dy’t God net leaut, lit Him foar in liger trochgean, omdat er net leaud hat yn it getugenis dat God oer syn Soan jûn hat. ₁₁En hjir komt dat getugenis op del: God hat ús ivich libben jûn en dat libben is yn syn Soan. ₁₂Dy’t de Soan hat, hat it libben; dy’t de Soan net hat, hat it libben net.

₁₃Dizze brief haw ik jimme skreaun, dat jimme witte sille dat jimme ivich libben hawwe, jimme dy’t leauwe yn ’e namme fan de Soan fan God. ₁₄Dit is de frijmoedichheid dy’t wy hawwe foar God oer, dat Hy nei ús harket, as wy Him wat freegje dat yn oerienstimming is mei syn wil. ₁₅As wy witte dat Er nei ús harket, wêr’t wy Him mar om freegje, witte wy ek dat wy krije sille wêr’t wy Him om frege hawwe. ₁₆As ien syn broer in sûnde dwaan sjocht, dy’t net ta de dea fiert, sil er foar him bidde en God sil him it libben skinke, te witten harren dy’t in sûnde dogge, dy’t net ta de dea fiert. Der is ek in sûnde dy’t ta de dea fiert; ik sis net dat er yn dat gefal bidde moat. ₁₇Alle ûngerjochtichheid is sûnde, mar der is ek sûnde dy’t net ta de dea fiert. ₁₈Wy witte dat gjin inkeld bern fan God sûndiget, nee, de Soan fan God bewarret him derfoar, en de kweade hat gjin fet op him. ₁₉Wy witte dat wy bern fan God binne, en dat de hiele wrâld yn ’e macht fan ’e kweade leit. ₂₀Wy witte ek dat de Soan fan God kommen is, en ús it fermogen jûn hat om de echte God te kennen; wy binne ferbûn mei dy echte God, yn syn Soan, Jezus Kristus. Dat is de echte God, dat is ivich libben. ₂₁Berntsjes, nim jim te wacht foar de ôfgoaden.