1 Kroniken 27

₁Dit is de list fan ’e Israeliten: de haden fan stamhuzen en oanfierders fan tûzen- en hûndertskippen mei har amtslju. Hja stienen yn tsjinst fan ’e kening foar alles wat de ôfdielings oanbelange. Alle moannen losten dy inoar ôf, it hiele jier troch. Elke ôfdieling bestie út 24.000 man.

₂Oer de earste ôfdieling, dy foar de earste moanne, stie Jasjobam, de soan fan Sabdiël. By syn ôfdieling hearden 24.000 man. ₃Hy wie ien fan ’e soannen fan Pêres en stie boppe alle legeroanfierders foar de earste moanne. ₄Oer de ôfdieling fan ’e twadde moanne stie Dodai de Achochyt; by syn ôfdieling hearde ek de befelhawwer Miklot. By syn ôfdieling hearden 24.000 man. ₅De tredde legeroanfierder, dy foar de tredde moanne, wie Benaja, de soan fan hegepryster Jojada. By syn ôfdieling hearden 24.000 man. ₆Dyselde Benaja wie ien fan de tritich helden en de oanfierder dêrfan; dêrom stie syn soan Ammizabad oer syn ôfdieling. ₇De fjirde, dy foar de fjirde moanne, wie Asahel, Joäb syn broer en nei him syn soan Sebadja. By syn ôfdieling hearden ek 24.000 man. ₈De fyfte, dy foar de fyfte moanne, wie oanfierder Sjamhût, de Jisrachyt. By syn ôfdieling hearden ek 24.000 man. ₉De sechste, dy foar de sechste moanne, wie Ira, de soan fan Ikkesj, de Tekoyt. By syn ôfdieling hearden ek 24.000 man. ₁₀De sânde, dy foar de sânde moanne, wie Chêles, de Pelonyt, ien út ’e neiteam fan Efraïm. By syn ôfdieling hearden ek 24.000 man. ₁₁De achtste, dy foar de achtste moanne, wie Sibbekai, de Chûsjatyt, ien fan ’e Sarchiten. By syn ôfdieling hearden ek 24.000 man. ₁₂De njoggende, dy foar de njoggende moanne, wie Abiêzer, de Anatotyt, ien fan ’e Benjaminiten. By syn ôfdieling hearden ek 24.000 man. ₁₃De tsiende, dy foar de tsiende moanne, wie Maherai, de Netofatyt, ien fan ’e Sarchiten. By syn ôfdieling hearden ek 24.000 man. ₁₄De alfte, dy foar de alfte moanne, wie Benaja, de Piratonyt, ien út ’e neiteam fan Efraïm. By syn ôfdieling hearden ek 24.000 man. ₁₅De tolfte, dy foar de tolfte moanne, wie Cheldai, de Netofatyt út it laach fan Otniël. By syn ôfdieling hearden ek 24.000 man.

₁₆Oer de stammen fan Israel stienen as befelhawwers: oer de Rûbeniten Eliêzer, de soan fan Sikry; oer de Simeöniten Sjefatja, de soan fan Maäka; ₁₇oer Levy Chasjabja, de soan fan Kemûël; oer Aäron Sadok; ₁₈oer Juda Elihû, ien fan Davids bruorren; oer Issaskar Omry, de soan fan Mikaël; ₁₉oer Sebûlon Jisjmaja, de soan fan Obadja; oer Naftaly Jerimot, de soan fan Azriël; ₂₀oer de neiteam fan Efraïm Hosjéa, de soan fan Azasja; oer de heale stam fan Manasse Joël, de soan fan Pedaja; ₂₁oer de helte fan Manasse-yn-Gileäd: Jiddo, de soan fan Sekarja; oer Benjamin Jaäsiël, de soan fan Abner; ₂₂oer Dan Azarel, de soan fan Jerocham. Dat wienen de oanfierders fan ’e stammen fan Israel.

₂₃David hat lykwols it tal fan harren dy’t tweintich jier en jonger wienen net opnimme litten. Want de Heare hie sein, hy soe Israel sa machtich meitsje as de stjerren oan de himel. ₂₄Joäb, de soan fan Serûja, wie wol mei tellen út ein set, mar hy hie it net ta in ein brocht, want troch dat tellen wie Gods grime oer Israel kommen. Dêrom is dat tal net opnommen yn ’e kroniken fan kening David.

₂₅Oer de foarrieden fan ’e kening gong Azmawet, de soan fan Adiël, en oer de foarrieden bûtenút, yn ’e stêden, yn ’e doarpen en yn ’e tuorren, Jonatan, de soan fan Gizzía. ₂₆Oer it folk dat de grûn beärbeidzje moast, gong Ezry, de soan fan Kelûb. ₂₇Oer de wyngerds gong Sjimy, de Ramatyt, en oer de wynfoarrie dy’t yn ’e wyngerds opslein wie, Sabdy, de Sjifmyt. ₂₈Oer de olivebeammen en wylde figebeammen yn it leechlân gong Baäl-Chanan, de Gederyt; oer de oaljefoarrieden Joäsj. ₂₉Oer de kij dy’t yn Sjaron weiden, gong Sjitrai, de Sjaronyt, en oer de kij yn ’e dellingen Sjifat, de soan fan Adlai. ₃₀Oer de kamielen gong Obil, de Ismaelyt, en oer de ezelinnen Jechija, de Meronotyt. ₃₁Oer it lytsfee gong Jazis, de Hagryt. Dat wienen allegearre hege amtslju, dy’t it behear hienen oer it besit fan kening David.

₃₂Jonatan, David syn neef, wie riedshear, in kundich man, dy’t him tige mei de pinne rêde koe. Hy en Jechiël, de soan fan Hakmony, hâlden har dwaande mei de kening syn soannen. ₃₃Achitofel wie ek riedshear fan de kening, en Chûsai, de Arkyt, wie de kening syn freon. ₃₄Nei Achitofel kamen Jojada, de soan fan Benaja, en Abjatar. Befelhawwer oer it leger fan ’e kening wie Joäb.