1 Kroniken 26

₁Wat de yndieling fan ’e poartewachters oangiet: fan ’e Korachiten: Mesjêlemja, de soan fan Koaree, ien fan ’e soannen fan Asaf; ₂Mesjêlemja syn soannen: Sekarja, de earstlingssoan, Jedaïel, de twadde, Seladja, de tredde en Jatniël, de fjirde; ₃Elam, de fyfte, Jechochanan, de sechste, Eljehoënaí, de sânde; ₄Obed-Edom syn soannen: Semaja, de earstlingssoan, Jozabad, de twadde, Joäch, de tredde, Sakar, de fjirde en Netanel, de fyfte, ₅Ammiël, de sechste, Issjakar, de sânde, Peûlletai, de achtste. Ja, God hie him segene. ₆Syn soan Semaja krige soannen, mannen dy’t yn har stamhûs gâns te sizzen hienen, want it wienen mannen fan oansjen. ₇Semaja syn soannen: Otny, Refaël, Obed, Elzabad en syn bruorren, lju fan oansjen: Elihû en Semakja. ₈Dat wienen allegearre neikommelingen fan Obed-Edom, sysels, har soannen en har bruorren, lju fan oansjen, berekkene foar de tsjinst, twaënsechstich mei-inoar, út it skaai fan Obed-Edom; ₉fan Mesjêlemja, syn soannen en bruorren, lju fan oansjen, achttjin mei-inoar; ₁₀fan Chosa, ien fan ’e soannen fan Merary, de soannen: Sjimry, it famyljehaad – alhoewol’t er net de earstlingssoan wie, hie syn heit him oan it haad fan ’e famylje set – ₁₁Chilkía, de twadde, Tebalja, de tredde, Sekarja, de fjirde; mei-inoar trettjin, al de soannen en bruorren fan Chosa.

₁₂Dy ôfdielings fan ’e poartewachters, neffens de famyljehaden yndield, hienen krektlike goed as har bruorren, de tsjinst waar te nimmen yn it hûs fan de Heare. ₁₃Troch lotsjen waard útmakke, oer wat poarte de stamhuzen de wacht krigen; dat gou foar allegearre sûnder ûnderskie. ₁₄Foar de easterpoarte foel it lot op Sjêlemja. Syn soan Sekarja, dat in ferstannich riedsman wie, lotten se ek foar. Syn lot foel op ’e noarderpoarte; ₁₅Obed-Edom sines op ’e suderpoarte en syn soannen harres op ’e opslachromte; ₁₆Sjûppim en Chosa harres op ’e westerpoarte mei de dwingerpoarte derby, oan ’e wei dy’t oprint. ₁₇Op it easten stienen dei oan dei seis leviten, op it noarden fjouwer, op it suden fjouwer en by de opslachromte hieltyd twa; ₁₈by it bygebou op it westen stienen fjouwer oan ’e wei en twa by it gebou sels. ₁₉Dat wienen de ôfdielings fan ’e poartewachters út ’e soannen fan ’e Koarachiten en út Merary syn soannen.

₂₀Har bruorren, de leviten dy’t oer de skatten fan Gods hûs en oer de wijjeften gongen, wienen ₂₁de soannen fan Ladan, de Gersjonyt, dat wol sizze de haden fan ’e stamhuzen fan Ladan de Gersjonyt: Jechiëly, ₂₂de soannen fan Jechiëly, Setam en syn broer Joël; dy gongen oer de skatten fan it hûs fan de Heare. ₂₃Fan ’e Amramiten, de Jishariten, de Chebroniten en de Azziëliten ₂₄wie Sjebûel, de soan fan Gersjom, de soan fan Mozes, opperskatbewarder. ₂₅En wat syn famylje – Eliêzer syn neiteam – oangiet, dy syn soan wie Rechabja; dy syn soan Jesjaja; dy syn soan Joaran en dy syn soan wie Sjelomit. ₂₆Dyselde Sjelomit en syn bruorren gongen oer alle wijjeften dy’t kening David en de haden fan ’e stamhuzen, de kommandanten oer tûzen- en oer hûndertskippen en de legerkommandanten, skonken hienen; ₂₇dy hienen se skonken út ’e oarlochsbút, om it hûs fan de Heare gloarje te jaan. ₂₈Fierders stie alles wat de sjenner Samuël, Saul, de soan fan Kisj, Abner, de soan fan Ner, en Joäb, de soan fan Serûja, of wa oars ek mar skonken hie, ûnder tafersjoch fan Sjelomit en syn bruorren.

₂₉Fan ’e Jishariten wienen Kenaja en syn soannen rjochter en amtners oer Israel foar de saken dy’t bûten de timpel omgongen. ₃₀Fan ’e Chebroniten moasten Chasjabja en syn bruorren, 1700 lju fan oansjen, derop tasjen dat Israel bewesten de Jordaan it wurk foar de Heare en de tsjinst oan ’e kening trou waarnaam. ₃₁Fan ’e Chebroniten wie Jería it haad; yn it fjirtichste jier fan David syn keningskip is der ûndersyk dien nei de neiteam en de stamhuzen fan ’e Chebroniten en doe die bliken, dat der ûnder harren mannen fan oansjen wienen te Jazar yn Gileäd. ₃₂Syn bruorren wienen lju fan oansjen: 2700 haden fan stamhuzen; kening David stelde se oer de Rûbeniten, de Gaditen en de heale stam fan Manasse, yn alle saken fan ’e godstsjinst en fan it keninkryk.