Iepenbiering 22

₁Doe liet er my in rivier mei libben wetter sjen, sa klear as kristal, dy kaam út ’e troane fan God en fan it Laam. ₂Midden op ’e strjitte en oan wjerskanten fan ’e rivier stienen libbensbeammen dy’t tolve kear fruchten drage, ienris yn ’e moanne jouwe se frucht; en de blêden fan dy beammen meitsje de folken better. ₃Der sil gjin ferflokking, hoe dan ek, mear wêze. De troane fan God en fan it Laam sille deryn stean, en syn feinten sille Him tsjinje. ₄Se sille syn antlit sjen en syn namme sil harren op ’e foarholle skreaun stean. ₅Nacht sil it dêr ek net mear wurde, en se sille gjin ferlet mear fan lampeljocht of sinneljocht hawwe, want God de Hear sil harren beskine, en se sille as keningen hearskje yn alle ivichheid.

₆De ingel sprekt: Doe sei er tsjin my: Dizze wurden binnen betrouber en wier, en God de Hear, dy’t de profeten besielet, hat syn ingel derop útstjoerd om syn feinten sjen te litten wat mei gauwens syn beslach krije moat.

₇Kristus sprekt: Ja wier, Ik kom mei gauwens. Gelokkich is hy, dy’t him oan de profetyske wurden fan dit boek fêsthâldt.

₈Ik, Johannes, haw dy dingen heard en sjoen. En doe’t ik se heard en sjoen hie, foel ik de ingel foar de fuotten dy’t my dat sjen litten hie, om him te ferearjen. ₉Mar hy sei tsjin my: Lit dat; ik bin ek mar in tsjinstfeint lykas do en dyn bruorren, de profeten en hja dy’t oan ’e wurden fan dit boek fêsthâlde; oanbid allinne God. ₁₀En hy sei tsjin my: Fersegelje de profetyske wurden fan dit boek net, want it is hast safier. ₁₁Dy’t ûnrjocht docht, lit dy noch mar mear ûnrjocht dwaan, dy’t smoarch is, lit dy him noch smoarger meitsje; lit de rjochtfeardige trochgean mei it goede te dwaan, lit de hillige noch hilliger wurde.

₁₂Kristus sprekt: Ja, Ik kom mei gauwens, en Ik haw myn beleanning by My, om elk lean nei wurk te jaan. ₁₃Ik bin de alfa en de oméga, de Earste en de Lêste, it begjin en de ein. ₁₄Gelokkich dy’t har klean waskje, want dy krije it rjocht op ’e libbensbeam en om troch de poarten ta de stêd yngean te meien. ₁₅Dêrbûten bliuwe de hûnen, de tsjoenders, de huorrejagers, de moardners, de ôfgodstsjinners en elk dy’t nocht oan ligen hat.

₁₆Ik, Jezus, haw myn ingel stjoerd om jimme dit oer de gemeente bekend te meitsjen. Ik bin de sprút, de ôfstammeling fan David, de skitterjende Moarnsstjerre.

₁₇En de Geast en de breid sizze: Kom. Dy’t it heart, lit him ek sizze: Kom. Lit komme dy’t toarst hat; lit elk dy’t dat wol, foar neat libbenswetter drinke.

₁₈Ik ferklearje oan in elk dy’t de profetyske wurden fan dit boek heart: As ien der wat oan tafoeget, God sil him de pleagen tafoegje dy’t yn dit boek beskreaun binne; ₁₉en as ien wat ôfnimt fan de wurden fan dit profetyske boek, dan sil God him syn diel ôfnimme fan ’e libbensbeam en fan ’e hillige stêd, dy’t yn dit boek beskreaun binne.

₂₀Hy dy’t hjir foar ynstiet, seit: Ja, Ik kom mei gauwens. Amen, kom, Hear Jezus.

₂₁Mei de genede fan Jezus de Hear mei jimme allegearre wêze.