Psalmen 99

₁De Heare is kening, no beevje de folken.

Hy troanet op kearûb-ingels, no trillet de ierde.

₂De Heare is heech op de Sion,

ferheven boppe alle folken.

₃Lit har jo namme loovje;

grut, ûntsachlik en hillich is Hy.

₄In sterke is kening wurden, ien dy’t it rjocht leaf hat.

Jo ha de rjochtsregels fêstlein,

Jo hawwe rjocht en gerjochtichheid dien yn Jakob.

₅Ferheegje de Heare, ús God,

fal del foar syn fuotbank –

hillich is Hy.

₆Mozes en Aäron wienen by syn prysters,

Samuël by dy’t syn namme oanrôpen.

Hja rôpen oan ’e Heare en Hy antwurde har.

₇Yn in wolkkolom spriek Er har ta

en se hâlden har oan syn tsjûgenissen,

oan it foarskrift dat Er har joech.

₈Heare, ús God, Jo hawwe har antwurd jûn,

Jo wienen har in God dy’t ferjoech,

mar ek ien dy’t har misdieden strafte.

₉Ferheegje de Heare, ús God,

fal del foar syn hillige berch –

hillich is de Heare, ús God.