Deuteronomium 27

₁Doe droech Mozes mei de âldsten fan Israel it folk op: Hâld it hiele gebod dat ik jimme hjoed opdraach, yn eare. ₂De deis dat jimme oer de Jordaan gien binne nei it lân dat de Heare dyn God dy jout, dan moatst grutte stiennen oereinsette en dy mei kalk bestrike. ₃Do moatst dêr alle wurden fan dizze wet op skriuwe asto oerstutsen bist om yn it lân te kommen dat de Heare dyn God dy jout, in lân dat oerrint fan molke en hunich, lykas de Heare, de God fan dyn foarfaars, dy tasein hat.

₄As jimme dan de Jordaan oerstutsen binne, dan moatte jimme dizze stiennen, dêr’t Ik jimme hjoed bestel oer jou, oereinsette op ’e berch Ebal en se mei kalk bestrike. ₅Dan moatst dêr in alter bouwe foar de Heare dyn God, in alter fan stien dêrst gjin izeren ark foar brûke meist. ₆Fan ûnbewurke stien moatst dat alter fan de Heare dyn God bouwe en do moatst dêr brânoffers foar de Heare dyn God op offerje. ₇Ek moatst frede-offers slachtsje en dêr ite en do moatst bliid wêze by de Heare dyn God. ₈Dan moatst tige dúdlik alle wurden fan dizze wet op dy stiennen skriuwe.

₉Doe sprieken Mozes en de Levityske prysters ta hiele Israel: Wês stil, Israel en harkje: Hjoed bisto it folk fan de Heare dyn God wurden. ₁₀Harkje dêrom nei wat de Heare dyn God dy seit en kom syn geboaden en foarskriften nei, dy’t ik dy hjoed jou.

₁₁Dy deis droech Mozes it folk op: ₁₂As jimme de Jordaan oerstutsen binne, dan moatte dizze stammen stean gean op ’e berch Gerizim om it folk te segenjen: Simeon, Levy, Juda, Issaskar, Joazef en Benjamin. ₁₃En dy op ’e Ebal foar de flok: Rûben, Gad, Azer, Sebûlon, Dan en Naftaly. ₁₄Dan moatte de Leviten it wurd nimme en mei in útset lûd tsjin alle man fan Israel sizze:

₁₅Ferflokt de man dy’t in houd of getten byld, in ôfgriis foar de Heare, wurk fan fakmanshannen, makket en dat temûk opstelt. En it hiele folk sil dan sizze: Amen. ₁₆Ferflokt wa’t syn heit en mem ferachtet. En it hiele folk sil dan sizze: Amen. ₁₇Ferflokt wa’t de grins fan syn neiste ferleit. En it hiele folk sil dan sizze: Amen. ₁₈Ferflokt wa’t in bline op ’e doele bringt. En it hiele folk sil sizze: Amen. ₁₉Ferflokt wa’t it rjocht fan frjemdling, wees en widdo ferdraait. En it hiele folk sil dan sizze: Amen. ₂₀Ferflokt wa’t by syn heite frou leit, want hy hat syn heite tekken opslein. En it hiele folk sil dan sizze: Amen. ₂₁Ferflokt wa’t by it iene of oare dier leit. En it hiele folk sil dan sizze: Amen. ₂₂Ferflokt wa’t by syn suster, syn heite of syn memme dochter, leit. En it hiele folk sil dan sizze: Amen. ₂₃Ferflokt wa’t by syn skoanmem leit. En it hiele folk sil dan sizze: Amen. ₂₄Ferflokt wa’t syn neiste temûk deaslacht. En it hiele folk sil dan sizze: Amen. ₂₅Ferflokt wa’t him omkeapje lit om ûnskuldich bloed te ferjitten. En it hiele folk sil dan sizze: Amen. ₂₆Ferflokt wa’t de wurden fan dizze wet net heechhâldt en se net neikomt. En it hiele folk sil dan sizze: Amen.