1 Johannes 2

₁Myn berntsjes, dit skriuw ik jimme, om jimme foar sûndigjen te bewarjen. En as ien al sûndiget, wy hawwe ien dy’t it foar ús opnimt by de Heit, Jezus Kristus de rjochtfeardige; ₂Dy is it dy’t troch syn offer ús sûnden útwisket en net allinne uzes mar ek dy fan de hiele wrâld. ₃Hjir witte wy oan, dat wy Him kenne: as wy ús oan syn geboaden hâlde. ₄Dy’t seit: Ik ken Him, mar him net oan syn geboaden hâldt, is in liger, en gjin earlik man; ₅mar dy’t him al oan syn wurd hâldt, yn him komt de leafde fan God wier ta syn doel. Dêr witte wy oan, dat wy mei Him ferbûn binne. ₆Dy’t seit dat er mei Him ferbûn is, moat krektlyk troch it libben gean as Hysels troch it libben gien is.

₇Freonen, ik skriuw jimme gjin nij gebod foar, mar in âld gebod, dat jimme fan it begjin ôf al hân hawwe; dat âlde gebod is it wurd, dat jimme heard hawwe. ₈Dochs is it ek wer in nij gebod dat ik jimme skriuw; it jildt foar Him en foar jimme, want it tsjuster giet foarby en it echte ljocht skynt al. ₉Dy’t seit dat er yn it ljocht is, en dochs syn broer hatet, sit noch altiten yn it tsjuster. ₁₀Dy’t syn broer leafhat, bliuwt yn it ljocht, en stroffeljen is der mei him net by. ₁₁Mar dy’t syn broer hatet is yn it tsjuster; hy rint yn it tsjuster en wit net, wêr’t er bedarret, want it tsjuster hat him blyn makke.

₁₅Haw de wrâld en de dingen fan ’e wrâld net leaf. As ien de wrâld leafhat, is de leafde fan ’e Heit net yn him. ₁₆Want al wat yn ’e wrâld is, it al te minsklik begearen en it begearen fan ’e eagen en it grut gean op jins besit, komt net út ’e Heit, mar út ’e wrâld fuort. ₁₇De wrâld giet foarby en har begearen ek; mar dy’t Gods wil docht, bliuwt yn ivichheid.

₁₈Berntsjes, it is de lêste oere. Jimme hawwe der wol fan heard dat der in anty-Kristus komme moat. No al binne der ferskate sokke anty-Kristussen opstien; dêr witte wy oan, dat it de lêste oere is. ₁₉Se binne út ús fermidden weikommen, se hearden lykwols net by ús; as se by ús heard hienen, wienen se wol by ús bleaun. Mar it moast dúdlik wurde, dat net ien fan harren by ús heart. ₂₀Jimme hawwe ek de salving fan ’e Hillige krige, dat jimme hawwe der allegearre weet fan. ₂₁Ik haw jimme net skreaun omdat jimme de wierheid net kenne soenen, mar just omdat jimme dy al kenne, en omdat gjin inkelde leagen wat mei de wierheid te krijen hat. ₂₂Wa oars is de liger, as dy’t ûntstriidt dat Jezus de Kristus is? Dat is de anty-Kristus, dy’t Heit en Soan ôfwiist. ₂₃Elk dy’t de Soan ôfwiist, hat ek gjin bân mei de Heit; dy’t him foar de Soan útsprekt, hat ek in bân mei de Heit. ₂₄Bliuw jimme by wat jimme fan it begjin ôf heard hawwe; as jimme bliuwe by wat jimme fan it begjin ôf heard hawwe, sille jimme sels de bân mei de Soan en de Heit bewarje. ₂₅Dit is wat de Heit ús sels tasein hat: it ivige libben. ₂₆Ik haw jimme dit skreaun mei it each op harren dy’t jimme op ’e doele bringe wolle. ₂₇En jimme – de salving dy’t jimme fan Him krige hawwe bliuwt op jimme. Jim hawwe gjin ferlet fan in oare learaar; mar lykas syn salving jimme oer alles beleart, sa is it ek wier en gjin leagen, en lykas dy it jimme leard hat: bewarje de bân mei Him.

₂₈No dan, berntsjes, bewarje de bân mei Him, dat wy frijmoedichheid hawwe meie en ús net foar Him oer hoege te skamjen as Er komt. ₂₉Jimme witte, dat Er rjochtfeardich is; dan moatte jimme ek begripe, dat elk dy’t docht wat rjocht is, syn bern is.