Romeinen 16

₁Ik priizje jimme ús suster Fébé oan, dy’t de gemeente yn Kenchreeën tsjinnet. ₂Nim har op yn ’e namme fan de Hear, lykas dat yn ’e tsjerke heart, en stean har by yn alles dêr’t se jimme help by brek is. Want sels is se gâns minsken ta in stipe wurden, ek mysels. ₃Doch de groetenis oan Priska en Aquila, myn meiwurkers yn ’e tsjinst fan Kristus Jezus. ₄Se hawwe har eigen libben weage om mines te rêden. Net allinnich ik, mar alle gemeenten út ’e heidenen binne harren tank skuldich. ₅Doch de groetenis ek oan ’e gemeente by har oan ’e hûs. De groetenis oan Epénetus, myn bêste freon, de earste út Asia dy’t ta Kristus kommen is. ₆De groetenis oan Maria, dy’t sa foar jimme yn ’e skrep west hat. ₇En oan Androníkus en Junias, myn lânslju, dy’t mei my oppakt west hawwe; se binne ferneamd ûnder de apostels en wienen al foar my kristen wurden. ₈De groetenis oan Ampliátus, myn bêste freon yn de Hear. ₉En oan Urbanus, ús meiwurker yn ’e tsjinst fan Kristus, en myn bêste freon Stachys. ₁₀Oan Apelles, dy’t doe’t it derop oankaam, in kristen útmakke hat, en oan it folk fan Aristobûlus. ₁₁Oan myn lânsman Heródion en oan ’e kristenen dy’t hearre by de húshâlding fan Narsissus. ₁₂De groetenis oan Tryféna en Tryfóza, dy’t sa skreppe yn ’e tsjinst fan de Hear. En oan ús leave suster Persis, dy’t sa warber west hat yn tsjinst fan de Hear. ₁₃Oan Rûfus, dy treflike kristen, en oan syn mem – dy’t foar my ek as in mem west hat. ₁₄Oan Asynkritus, Flegon, Hermes, Patrobas, Hermas en de kristenbruorren dy’t by harren binne. ₁₅De groetenis oan Filólogus en Julia, oan Neareus en syn suster, oan Olympas en alle hilligen dy’t by harren binne. ₁₆Groetsje inoar mei de fredegroet. Alle gemeenten fan Kristus dogge jimme de groetenis.

₁₇Mar ik fermoanje jimme, bruorren, om jimme te wacht te nimmen foar de lju dy’t spul sykje en oaren ta sûnde ferliede, yn striid mei alles dat jimme bybrocht is. Gean harren út ’e wei. ₁₈Want sokken tsjinje ús Hear Kristus net, mar har eigen begearten. Mei al har moaie praatsjes ferrifelje se de lju dy’t nearne gjin euvelmoed yn hawwe. ₁₉Want elkenien hat derfan heard, dat jimme harkje wolle nei Gods wurd. Dat sadwaande bin ik bliid om jimme. Want sa wol ik jimme hawwe: wiis yn it goede en net bedoarn troch it kweade. ₂₀God, dy’t frede jout, sil mei gauwens de Satan ûnder jimme fuotten ferwâdzje. De genede fan ús Hear Jezus wês mei jimme.

₂₁Timóteüs, myn meiwurker, docht jimme de groetenis en Lucius, Jason en Sosípater, myn lânslju. ₂₂Ik, Tertius, dy’t dizze brief opskreaun haw, doch jimme de groetenis yn de Hear. ₂₃De groetenis fan Gajus, myn gasthear en dy fan ’e hiele gemeente. En fan Erastus, de stêdsûntfanger, en fan ús broer Quartus. ₂₄De genede fan ús Hear Jezus Kristus wês mei jim allegearre.

₂₅Lof oan God! Hy hat it yn ’e macht en fersterkje jimme yn it leauwen. Sa haw ik it bliid boadskip brocht en Jezus Kristus ferkundige. Sa seit it de iepenbiering fan it geheim dat ieuwenlang ferswijd wie, ₂₆mar no oan it ljocht brocht en troch de skriften fan ’e profeten bekend makke is oan alle folken. Dat wie de opdracht fan de ivige God; sa woe Er har bringe ta harkjen en leauwen. ₂₇Him, de iennichst wize God, mei troch Jezus Kristus de gloarje wêze, oant yn ivichheid. Amen.