Psalmen 73

Wier, God is goed foar Israel,

foar harren dy’t suver fan hert binne.

₂Mar ik – myn fuotten wienen omtrint útgliden,

myn stappen wienen hast útskampt,

₃mei’t ik oergeunstich wie op dwylsinnigen,

om’t ik seach dat it de ferkearden goed gong.

₄Dy hawwe gjin swierrichheden,

geef binne se en sûn fan lea.

₅Fan it minskeleed krije se har part net

en se wurde net pleage lykas oaren.

₆Dêrom drage se har grutskens as in slot om ’e hals

en har geweld as in kleed om ’e lea.

₇De eagen pûdzje har fan fet,

it hert rint har oer fan grutskens.

₈Se hune en prate feninich,

benearjend út ’e hichte wei.

₉Se sette in mûle op tsjin de himel

en har tonge roert him tige op ’e ierde.

₁₀Sadwaande rint it folk har nei

en har wurden drinke se as wetter.

₁₁Se tinke: Wat soe God derfan witte,

hoe soe de Heechste der weet fan hawwe?

₁₂Dat binne se no, dy ferkearde minsken;

altyd wurde se sliepende ryk.

₁₃Om ’e nocht haw ik dus myn hert suver hâlden

en myn hannen yn ûnskuld wosken.

₁₄De hiele dei waard ik al mar pleage

en elke moarn op ’e nij kastijd.

₁₅As ik no sein hie: Ik wol krektsa prate as sij,

dan hie ik de minsken dy’t jo bern binne, ferret.

₁₆Mar as ik besocht it te begripen,

dan wie it my in pinigjende fraach ...

₁₇oant ik Gods hillichdom yngong

en seach wat der fan harren oerbliuwt.

₁₈Jawis, Jo sette har op glysterige paden,

Jo meitsje fan har in púnfal.

₁₉Hoe wurde se yn in sucht ta ûntsetting,

komme om en fergeane fan ’e skrik.

₂₀As in dream by it wekker wurden, sa binne se,

Jo slane har byld net iens acht,

as Jo ûntweitsje.

₂₁Sa faak myn hert ferbittere waard

en it my op ’en djipsten stiek,

₂₂wie ik in stik fee en ik begriep neat;

ik wie in stik fee by Jo!

₂₃Mar dochs, ik bin altyd by Jo;

Jo ha my by de rjochterhân krige,

₂₄Jo liede my, sa’t jo doel is,

en dan ... nimme Jo my op yn hearlikheid.

₂₅Wa haw ik yn ’e himel?

Njonken Jo winskje ik neat op ierde.

₂₆Mocht myn lichem en hert ek beswike,

ivich bliuwt God myn rots en myn diel.

₂₇Want sjoch, dy’t fan Jo ôfwike, fergeane,

dy’t Jo ûntrou wurde – Jo ferdylgje se allegearre.

₂₈Mar it is myn gelok deun by God te wêzen.

By God de Heare haw ik myn taflecht fûn

en ik sil al syn dieden ferhelje.