Psalmen 68

₂God komt oerein, de fijannen spatte útinoar,

syn haters geane foar Him op ’e flecht.

₃Lykas reek ferjage wurdt, sa ferjeie Jo har;

lykas waaks raant foar it fjoer,

sa wurde ferkearde minsken wei foar God.

₄De rjochtfeardigen ferbliidzje har,

jubelje foar Gods antlit,

binne optein fan wille.

₅Sjong foar God, besjong syn namme,

priizje Him dy’t op ’e wolken riidt:

Heare is syn namme, jubelje foar Him.

₆In heit is Er foar de wezen,

de widdowen helpt Er oan har rjocht,

God yn syn hillige wente.

₇Omswalkers jout God wer in thús,

gefangenen set Er yn ’e oerfloed,

mar de lefferts sille yn earmoed ferkeare.

₈O God, doe’t Jo ienris foar Jo folk útgongen

op jo tocht troch de wyldernis,

₉doe droande de ierde en dripte de himel

foar God, de God fan ’e Sinai,

foar God, de God fan Israel.

₁₀Stjalprein sproeiden Jo oer jo erffolk, o God,

en waarden se wurch, dan hâlden Jo har oerein.

₁₁Jo leger koe him dêr deljaan

en myld soargen Jo foar dy earmelytsen, o God.

₁₂As de Hear strak de beslissing jout,

sil in rige froulju blide tynge dwaan,

₁₃de keningen sille mei har legers op ’e flecht gean

en thús sille de froulju de bút ferparte.

₁₄En as jim dan wer njonken de hiemfredingen lizze,

binne de dowewjukken mei sulver belein

en har flerken mei giel goud.

₁₅As de Heechste dêr de keningen ferslacht,

sil it op ’e Salmon snije.

₁₆In machtige berch, dy Bazanberch!

In heechkoppige berch, dy Bazanberch!

₁₇Wêrom, heechkoppige bergen, sjogge jim oergeunstich

nei de berch dy’t God Him as wente útsocht hat?

Grif sil de Hear dêr foargoed wenje.

₁₈Untelbere tûzenen striidweinen hie God,

doe’t Er fan ’e Sinai teach nei it hillichdom.

₁₉Jo kamen fanwegen, fierden gefangenen mei

en krigen fan minsken geskinken oanbean.

Mar de lefferts moasten thúsbliuwe –

de Heare is God.

₂₀Heech te priizjen is de Heare al den dei;

Hy draacht ús, de God dy’t ús rêdt.

₂₁Dy God is ús in God dy’t befrijt.

De Heare God kin rêde fan ’e dea.

₂₂God sil wis ús fijannen de kop tepletterje,

de rûge plasse fan har dy’t net ophâlde mei kweadwaan.

₂₃De Heare hat al sein: Ik helje se op út Bazan

en Ik helje se op út ’e djippe see.

₂₄Dan kin jimme foet yn bloed baaie

en de tonge fan jimme hûnen har part krije fan ’e fijannen.

₂₅Se sjogge al nei jo optocht, o God,

de optocht fan myn God en kening nei it hillichdom:

₂₆Foarop de koarsjongers en achteroan de muzikanten

en dêr tuskenyn de fammen mei de lytse tromme.

₂₇Hja sille God priizje yn kloften,

Israels jongerein prizet de Heare.

₂₈Dêr hat Benjamin as lytste de lieding,

de lieders fan Juda yn rigen,

de lieders fan Sebûlon, de lieders fan Naftaly. –

₂₉Kom no fanwegen o God, mei jo macht,

de macht, o God, dy’t Jo ús betoand hawwe,

₃₀út jo wente wei, boppe yn Jeruzalem.

De keningen moatte Jo geskinken bringe.

₃₁Bedriigje it beest yn ’e reiden,

de bollebinde en kealletroep fan ’e folken.

Fertraapje har dy’t gleon op jild binne,

ferstrui de folken dy’t oarloch wolle.

₃₂Eallju sille komme út Egypte

en Etiopiërs mei geskinken foar God by ’t hânfol.

₃₃Sjong God ta, keninkriken fan ’e ierde,

sjong psalmen foar de Hear,sela

₃₄foar Him dy’t troch de oerâlde himelen riidt.

Hark, hoe’n machtich lûd Er jout.

₃₅Erken God syn macht,

Hy is ferheven boppe Israel,

syn krêft is yn ’e wolken.

₃₆Untsachlik is God, as Er út syn hillichdom komt.

Hy is de God fan Israel,

dy’t syn folk macht en sterkte jout.

Heech te priizjen is God!