Psalmen 43

₁Doch my rjocht, o God,

gean foar my yn ’e pleit

tsjin it folk dêr’t gjin trou by is.

Rêd my fan ’e minsken,

dy’t gearhingje fan ûnrjocht en bedroch.

₂Want Jo binne de God dêr’t ik taflecht by fyn.

Wêrom ferstjitte Jo my dan?

Wêrom moat ik yn ’e rou omrinne

ûnder de druk fan ’e fijân?

₃Stjoer dochs jo ljocht en jo trou,

dat dy my liede meie,

dat dy my bringe nei jo hillige berch

en nei jo wijde wente,

₄dat ik by Gods alter komme mei,

by God, dy’t my bliid makket,

en dan jubelje en tankje by de liere,

o God, o myn God!

₅Wêrom sa ferbûke, myn siele,

wat makkest dy dochs oerstjoer?

Wachtsje op God,

want ienris sil ik Him dochs wer loovje,

myn eigen Ferlosser en myn God.