Psalmen 30

₂Heech wol ik Jo sette, Heare,

want Jo hawwe my omheechhelle;

Jo gunden myn fijannen gjin wille om my.

₃Heare, myn God, oan Jo rôp ik om help,

en Jo hawwe my better makke.

₄O Heare, Jo lieten my út it deaderyk ferrize,

Jo joegen my it libben, doe’t ik yn it grêf sonk.

₅Sjong de Heare in liet, jimme, syn geunstlingen,

loovje syn hillige namme.

₆Want ien eachwink duorret syn grime,

mar in libben lang syn geunst;

de jûns giet it skriemen de nacht yn,

mar de oare moarns is der gejubel.

₇Yn myn soargeleazens tocht ik:

Noait sil ik wifkje, o nee.

₈Troch jo geunst wie myn berch wol fêstset, Heare,

mar doe’t Jo my de rêch takearden,

wie ik myn rie te’n ein.

₉Oan Jo, Heare, rôp ik

en ik frege myn Hear om genede:

₁₀Wat winst hawwe Jo fan myn dea,

as ik delsink djip yn it grêf?

Kin stof Jo soms loovje,

kin dat soms fertelle fan jo trou?

₁₁Heare, harkje en jou my genede,

wês Jo my, Heare, in helper.

₁₂Jo hawwe myn kleien yn dûnsjen feroare,

Jo hawwe my de rouklean útlutsen

en mei freugde my begurde.

₁₃Dat, no sjong ik Jo fan herten myn psalmen

en hâld der net wer mei op.

Heare, myn God,

ivich sil ik Jo loovje!