Psalmen 143

Heare, hear myn gebed,

harkje nei myn smeekjen.

Ferhear my yn jo trou,

om jo gerjochtichheid.

₂Gean mei jo tsjinner net yn ’e pleit,

want gjin minske is foar Jo rjochtfeardich.

₃In fijân sit achter my oan,

hy trapet my al yn ’e grûn

en lit my yn ’e tsjusternis wenje,

lykas sij dy’t al lang wei binne.

₄Dêrom bejout him myn geast

en is myn hert ferbjustere.

₅Ik tink oan ’e dagen fan alear,

ik gean al jo dieden nei,

ik bemimerje it wurk fan jo hannen.

₆No stek ik de hannen nei Jo út,

ik smachtsje nei Jo as toarstige grûn.

₇Jou mei hasten antwurd, Heare,

myn geast is ynein;

kear Jo net fan my ôf,

dat ik net ien fan harren wurd,

dy’t yn it grêf delsonken binne.

₈Lit my yn ’e moarntyd jo geunst fernimme,

want ik betrou op Jo.

Wiis my de wei, dy’t ik gean moat,

want ik ferlangje nei Jo.

₉Rêd my fan myn fijannen, Heare,

want by Jo is myn ûntwyk.

₁₀Lear my jo wil te dwaan,

want Jo binne myn God.

Lit jo goede Geast my liede

op in sljochte baan.

₁₁Om jo namme, Heare, gun my it libben;

om jo gerjochtichheid, rêd my út it gefaar.

₁₂Yn jo geunst, ferdylgje myn fijannen,

ferdoch allegear, dy’t my benearje;

ik bin ommers jo tsjinner.