Psalmen 14

Dwazen binne it, dy’t tinke:

Der bestiet gjin God.

Ferdoarn en ôfgryslik binne har dieden,

der is gjinien dy’t goeddocht.

₂De Heare sjocht fan ’e himel del op ’e minsken,

oft der ek ien is, dy’t syn ferstân brûkt,

ien dy’t God siket.

₃Allegearre binne se ôfwykt,

mei-inoar ûntaarde,

gjinien dy’t goeddocht,

alhielendal net ien.

₄Witte dy kweaminsken dan allegear fan neat,

dy’t myn folk fersline

as ieten se brea,

mar de Heare net oanroppe?

₅Skielk sille se lykwols alhiel ferbjustere stean,

want de Heare is mids it rjochtfeardige folk.

₆Jimme doel mei de ellindigen sil mislearje,

want de Heare is har beskermer.

₇Och, dage der fan ’e Sion no mar rêding op foar Israel!

As de Heare foar syn folk de grutte omkear bringt,

dan sil Jakob jubelje,

Israel wille meitsje.