Psalmen 135

Priizje de namme fan de Heare,

priizje Him, tsjinners fan ’e Heare,

₂jim, dy’t tsjinst dogge yn it hûs fan ’e Heare,

yn ’e foarhôven fan it hûs fan ús God.

₃Priizje de Heare, want Hy is goed,

besjong syn namme, want dy is leaflik.

₄De Heare hat Jakob ommers útkard,

Israel as syn eigendom.

₅Ik erken dat de Heare grut is,

ús Hear giet alle goaden fier te boppe.

₆Wat Er wol, dat docht de Heare

yn ’e himel en op de ierde,

op see en yn alle djipten.

₇Hy lit de wolken komme fan ierdrykseinen,

Hy slingeret de wjerljocht troch de rein.

Hy lit de wyn los út syn foarriedkeamers.

₈Hy sloech de earstbernen fan Egypte,

de minsken sagoed as it fee.

₉Hy stjoerde tekens en wûnders

yn dyn fermidden, o Egypte,

tsjin de Farao en al syn tsjinners.

₁₀Hy sloech machtige folken

en sterke keningen deade Hy:

₁₁Sichon, de kening fan ’e Amoriten,

Og, de kening fan Bazan,

en alle keninkriken fan Kanaän.

₁₂Har lân joech Er as erfskip,

as erfskip oan Israel, syn folk.

₁₃Heare, Jo hawwe in namme foar ivich,

Heare, Jo bliuwe yn oantinken fan âlder op âlder.

₁₄Want de Heare sil syn folk rjocht dwaan.

Hy is barmhertich foar al syn tsjinners.

₁₅De goadebylden fan ’e folken binne sulver en goud,

se binne makke troch minskehannen.

₁₆Se hawwe in mûle, mar prate net,

se hawwe eagen mar sjogge net,

₁₇Se hawwe earen mar hearre net

en se hawwe gjin siken yn ’e mûle.

₁₈Dy’t har makke hawwe, moatte wurde as sij,

en elk dy’t op har fertrout.

₁₉Jimme, Israeliten, priizje de Heare!

Jimme, Aäroniten, priizje de Heare!

₂₀Jimme, Leviten, priizje de Heare!

Dy’t ûntsach foar de Heare hawwe, priizje de Heare!

₂₁Heech te priizjen is de Heare út Sion wei,

Hy dy’t wennet yn Jeruzalem.

Halleluja!