Psalmen 124

As de Heare net mei ús west hie,

– moat Israel sizze –

₂as de Heare net mei ús west hie,

doe’t minsken ús tenei kamen,

₃dan hienen se ús libbensliif ferskuord,

sa heech lôge har grime tsjin ús op.

₄Dan hie it wetter ús meisleept,

in floed wie oer ús hinne slein;

₅dan wie it wylde wâljende wetter

alhiel oer ús hinne slein.

₆Mar heech te priizjen is de Heare,

dy’t ús net oerjoech

as in proai foar har tosken.

₇Us libben is ûntkommen as in fûgel

oan it net fan ’e fûgelflapper.

It net is skuord

en wy, wy binne ûntkommen.

₈Us helper is de Heare

dy’t himel en ierde makke hat.