Psalmen 11

As ik by de Heare ûntwyk fyn,

hoe kinne jim dan tsjin my sizze:

Flean as in fûgel de bergen yn?

₂Want dy ferkearden dêre spanne de bôge,

se hawwe de pylk al op ’e koarde lein

om yn it tsjuster te sjitten op minsken

dy’t it hert op it rjochte plak hawwe.

₃As de fûneminten har bejouwe,

wat kin de rjochtfeardige dan noch út ’e wei sette?

₄De Heare is yn syn hillige timpel,

de troan fan de Heare is yn ’e himel,

Hy skôget de wrâld,

syn eagen hifkje de minskebern,

₅de Heare hifket rjochtfeardigen en ferkearden

en syn hiele wêzen hatet minsken dy’t fan geweld hâlde.

₆Op dy ferkearden lit Er stikken fjoer en swevel reine

en in gleone stoarmwyn jout Er har foar de toarst.

₇Want rjocht is de Heare,

Hy hâldt fan rjochte dieden

en oprjochten sille Him yn ’e eagen sjen.