Mattéus 7

₁Feroardielje in oar net, dat God jimsels net feroardielet, ₂want it oardiel dat jimme oer in oar útsprekke, sil it oardiel oer jimsels wurde. En mei deselde mjitte dy’t jimme brûke, sil jim tametten wurde. ₃Wêrom sjogge jo wol de splinter yn it each fan jo broer en fernimme jo der neat fan dat jo in balke yn eigen each hawwe? ₄Hoe kinne jo dochs tsjin jo broer sizze: Lit my dy splinter ris by dy út it each helje? Sjoch, der sit jo in balke yn it eigen each. ₅Skynhillige, helje earst de balke mar ris út it eigen each. Dan kinne jo genôch sjen om de splinter by jo broer út it each te heljen. ₆Jou it hillige net oan ’e hûnen en smyt de bargen gjin pearels foar. Dy sille se fertraapje en dan weromkomme om jimme te ferskuorren.

₇Freegje, en jim sil jûn wurde. Sykje, en jim sille fine. Klopje, en der sil foar jim iependien wurde. ₈Elk dy’t freget, kriget. Elk dy’t siket, fynt. Foar elk dy’t kloppet wurdt iependien. ₉Is der soms ien fan jimme, dy’t syn soan in stien jout, as er om brea freget; ₁₀of in slange, as er om in fisk freget? ₁₁No, as jimme, ferkeard as jim binne, jim bern goede dingen jouwe, hoefolste mear sil dan jimme himelske Heit it goede jaan oan dy’t der Him om freegje.

₁₂Alles wat jim wolle, dat de minsken jimme dogge, doch dat harren ek. Dêr komme wet en profeten op del.

₁₃Gean ta de nauwe poarte yn, want wiid is de poarte en breed de wei dy’t op it ferdjer oan giet, en der binne in bulte dy’t dat paad nimme. ₁₄Mar wat is de poarte nau en wat is de wei smel dy’t op it libben oan giet! Der binne mar in bytsje dy’t dy fine.

₁₅Hoedzje jim foar de falske profeten. Dy komme by jimme en dogge har foar as nuete skiep, mar inerlik binne it roppige wolven. ₁₆Oan har fruchten sille jim harren kenne. Men plôket dochs gjin druven fan toarnbosken en gjin figen fan stikels, wol? ₁₇Ja, elke goede beam jout goede fruchten, mar de fermôge beam oars net as minne. ₁₈In goede beam kin gjin minne fruchten jaan, in fermôge noait gjin goede. ₁₉Elke beam dy’t gjin goede fruchten jout, wurdt omhoud en yn it fjoer smiten. ₂₀Sa sille jim se kenne oan ’e fruchten.

₂₁Net elkenien dy’t ‘Hear, Hear’ tsjin My seit, sil it himelske ryk yn komme, mar allinne hy dy’t docht, wat myn himelske Heit wol. ₂₂Mannichien sil dy deis tsjin My sizze: Hear, Hear, hawwe wy net yn jo namme it goddelike boadskip brocht, yn jo namme duvels útband en yn jo namme hiel wat wûnders dien? ₂₃Ik sil harren dan planút sizze: Ik haw jimme noait kend. Gean by My wei, jimme mei jim ûngerjochtichheden!

₂₄Elkenien dy’t nei dizze wurden fan My heart en dêrneffens docht, liket op in man mei oerlis, dy’t syn hûs op ’e rotsgrûn boud hat. ₂₅It begjint te eazjen, it wetter fan ’e bergen komt delsetten, it waait in stoarm. En dat batst allegear tsjin dat hûs oan; mar it stoart net yn, want it stiet fêst op ’e rots. ₂₆Elkenien dy’t dizze wurden fan My wol heart en der net neffens docht, liket op ien dy’t syn hûs domwei op los sân boud hat. ₂₇It begjint te eazjen, it wetter fan ’e bergen komt delsetten, it waait in stoarm. Dat batst allegearre tsjin dat hûs oan. It stoart yn, it wurdt ien grutte púnfal.

₂₈Doe’t Jezus oan ’e ein kommen wie fan dizze taspraken, wie it folk tige optein oer syn ûnderrjocht, ₂₉want Hy die it as ien dy’t it te sizzen hat, en net sa as har wetlearaars.