Mattéus 3

₁Om dy tiid kaam Johannes de Doper yn ’e woestyn mei syn boadskip nei foaren. ₂Dat boadskip wie: Bekear jimme: it himelske ryk is tichteby kommen! ₃Wat profeet Jesaja sein hat, slacht ommers op Johannes:

₄Johannes hie klean fan kamielehier oan, in learene gurle om ’e mul en hy iet sprinkhoannen en wylde hunich. ₅Jeruzalem en hiele Judéa en ek de Jordaankrite setten doe op him ta. ₆Hja waarden troch him doopt yn ’e Jordaan, wylst se dêrby har sûnden belieden. ₇Doe’t er lykwols mannich Fariseeër en Sadduseeër kommen seach om doopt te wurden, sei er: Njirrebrod, wa hat jimme de wink jûn om de kommende grime te ûntrinnen? ₈Kom mar ris mei fruchten dy’t mei de bekearing stroke, ₉en tink net by jimsels: Wy hawwe Abraham as heit, want ik sis jimme: God kin út dizze stiennen hjir wol bern foar Abraham komme litte. ₁₀It is al sa fier hinne, dat de bile op ’e woartel fan ’e beammen set is. Alle beammen dy’t gjin goede frucht jouwe, wurde omkapt en yn ’t fjoer smiten. ₁₁Ik doop jimme mei wetter om sjen te litten, dat jim jim bekeare, mar nei my komt Ien dy’t sterker is as ik. Ik bin net iens wurdich Him syn sandalen te bringen. Hy sil jimme dope mei hillige Geast en fjoer. ₁₂De wanne hat Er al yn ’e hân om syn nôt te suverjen. It sied bringt Er byinoar yn ’e skuorre en it tsjêf sil Er ferbaarne yn in fjoer dat net út te krijen is.

₁₃Doe kaam Jezus út Galiléa wei by Johannes oan ’e Jordaan om troch him doopt te wurden. ₁₄Johannes woe Him keare en sei: Ik soe troch Jo doopt wurde moatte en no komme Jo by mij? ₁₅Jezus antwurde him: Lit my no mar gewurde. Sa dogge wy op ’en bêsten, wat God wol. Doe die Johannes, wat Jezus woe. ₁₆Sa gau’t Jezus doopt wie, kaam Er út it wetter wei. En sjoch, de himel skuorde iepen en Jezus seach Gods Geast as in do op Him delstriken. ₁₇En fan boppen klonk in stim: Dit is myn Soan, myn ynleave Jonge, dêr’t Ik sa wiis mei bin.