Judas 1

₁Fan Judas, de tsjinstfeint fan Jezus Kristus, de broer fan Jakobus, oan har dy’t roppen binne om te libjen yn ’e leafde fan God de Heit en yn ’e hoede fan Jezus Kristus. ₂Erbarming, frede en leafde mei jimme aloan riker jûn wurde.

₃Freonen, it wie altyd al myn doel om jimme te skriuwen oer ús mienskiplik heil, mar no fielde ik it as myn plicht om jimme der yn in brief op oan te stean, dat jimme stride sille foar it leauwen dat de gemeente ienris en foargoed trochjûn is. ₄Want der binne minsken yn ’e gemeente ynglûpt, lju dêr’t it oardiel al lang lyn oer beskreaun is, goddeleazen dy’t de genede fan God misbrûke as in ferlechje om der mar op los libje te kinnen en dy’t ús iene Hearsker en Hear Jezus Kristus ôffalle.

₅Ek al witte jimme alles mar al te goed, ik wol jimme dochs yn it sin bringe, dat de Hear it folk wol út Egypte befrijd hat, mar dochs letter har dy’t net op Him betrouden, ferdien hat. ₆Hy hat ek de ingels, dy’t har hege posysje ferspile en har eigen wenplak ferlitten hienen, foar ivich yn djippe tsjusternis yn ’e boeiens slein, om op ’e grutte Dei oardiele te wurden. ₇Sa ek Sodom en Gomorra en de stêden dêromhinne, dy’t op ’e selde wize as de ingels huorke en tsjinnatuerlike lusten neijage hawwe: no lizze se dêr as in warskôgjend foarbyld, straft dat se binne mei in ivich fjoer.

₈Krektlyk lykwols giet it mei dy lju, dy’t fizioenen sjogge, mar likegoed harsels besmodzje, Gods hearskippij ferachtsje en de himelske machten lasterje. ₉Mar doe’t Michael, de aartsingel, mei de duvel stried en iggewearre om it lyk fan Mozes, doarst er dy net mei lasterjende wurden feroardielje, nee, hy sei: De Hear mei dy bestraffe. ₁₀Mar dizze lju lasterje wat se net ienris begripe, en wat se ynstinktyf, lykas de redeleaze bisten, al begripe, dat wurdt krekt har ûndergong.

₁₁Wee, harren, want se binne de wei fan Kaïn opgien, se hawwe har lykas Bileäm om jild oan bedragerij skuldich makke en se sille fergean, omdat se yn opstân kommen binne lykas Koarach. ₁₂It is in skandaal sa’t se har oan jimme leafdemielen ûnbeskamsum tegoed dogge en allinne mar foar harsels soargje; wolken binne it, dy’t de wyn foarbyjaget, mar dêr’t gjin wetter fan komt; beammen dy’t yn ’e lette hjerst gjin fruchten jouwe, kroandea, ûntwoartele. ₁₃It binne wylde weagen op ’e see, dy’t har eigen skande as skom opspatte litte; dwaalstjerren, ornearre om foar ivich yn it djipste tsjuster te sitten.

₁₄Henoch, ien út ’e sânde generaasje nei Adam, hat dan ek fan harren profetearre mei de wurden: De Hear komt mei syn hillige tsientûzenen, ₁₅om rjochtdei te hâlden oer allegearre en om alle goddeleazen te bewizen dat se skuldich steane oan alle goddeleaze dingen dy’t se dien hawwe en oan alle bretale wurden dy’t de goddeleaze sûnders tsjin Him sprutsen hawwe. ₁₆Dat binne de minsken dy’t altyd prottelje en wrokje oer har lot, se libje nei har begearten, har mûle slacht oerdwealske taal út, se prate moai mei de minsken om, om der sels better fan te wurden.

₁₇Mar jimme, freonen, tink om de foarsizzingen dy’t de apostels fan ús Hear Jezus Kristus dien hawwe, ₁₈dat se tsjin jimme sein hawwe: Yn it lêstoan fan ’e tiid sille der spotters wêze, dy’t neffens har eigen goddeleaze begearten libje sille. ₁₉Dat binne de lju dy’t twaspjalt oproppe, al te minsklike lju, dy’t de Geast net hawwe.

₂₀Mar jimme, freonen, bou jim libben op jimme alderhillichst leauwen, bid yn ’e krêft fan ’e hillige Geast, ₂₁bewarje jimsels yn ’e leafde fan God, yn ’e ferwachting dat ús Hear Jezus Kristus yn syn barmhertigens jimme it ivige libben jaan sil. ₂₂Haw moederaasje mei guon dy’t twivelje; ₂₃rêd se, skuor se út it fjoer: oaren moatte jimme ek wol moederaasje mei hawwe, mar nim jimme tagelyk foar harren te wacht; ja, mij ek de klean dy’t troch de sûnde besmoarge binne.

₂₄Him dy’t jimme foar stroffeljen bewarje kin en jimme sûnder lek of brek mei jubel foar syn hearlikheid ferskine litte kin, ₂₅Him, ús iennichste God en Heilân, komt ear en majesteit, macht en krêft ta troch Jezus Kristus ús Hear fan alle ivichheid ôf, no en yn alle ivichheid. Amen.