Jozua 21

₁Doe kamen de famyljehaden fan ’e Leviten by pryster Eleäzar, by Jozua, de soan fan Nûn, en by de famyljehaden fan ’e Israelityske stammen, ₂yn Sjilo, dat yn it lân Kanaän leit. Hja seinen tsjin harren: troch de tsjinst fan Mozes hat de Heare hjitten ús stêden te jaan om dêr te wenjen mei it weidlân dêromhinne foar ús fee. ₃Doe joegen de Israeliten neffens it befel fan de Heare oan ’e Leviten de neikommende stêden mei it weidlân:

₄Der waard lotte foar de famyljes fan ’e Kehatiten. De bern fan Aäron, de pryster ûnder ’e Leviten, krigen troch lotsjen út ’e stammen fan Juda, Simeön en Benjamin trettjin stêden. ₅De oare Kehatiten krigen troch lotsjen út ’e famyljes fan ’e stammen fan Efraïm, Dan en de heale stam fan Manasse tsien stêden. ₆De Gersjoniten krigen troch lotsjen út ’e famyljes fan ’e stammen fan Issaskar, Azer en Naftaly en fan ’e heale stam fan Manasse yn Bazan trettjin stêden. ₇De famyljes fan ’e Mearariten krigen út ’e stammen fan Rûben, Gad en Sebûlon tolve stêden. ₈Sa hawwe de Israeliten dy stêden mei it weidlân troch it lot oan ’e Leviten tawiisd, lykas de Heare troch Mozes hjitten hie.

₉Ut ’e stammen fan ’e Judeeërs en de Simeöniten joegen se neikommende stêden dy’t se by namme neamden: ₁₀Se wienen foar de Aäroniten, út ’e famyljes fan ’e Kehatiten, dy’t ta de Leviten behearden, mei’t har lot it earst foel. ₁₁Hja joegen har de stêd fan Arba, de heit fan Anok, dat is Hebron op it berchlân fan Juda mei it weidlân dêromhinne. ₁₂It boulân fan ’e stêd lykwols mei de doarpen hienen se Kaleb, de soan fan Jefûnne, yn eigendom jûn. ₁₃Mar oan ’e bern fan Aäron, de pryster, joegen se de frijstêd foar de deaslaggers, Hebron, mei it weidlân, fierder Libna mei it weidlân, ₁₄Jattir mei it weidlân, Esjtemoä mei it weidlân, ₁₅Cholon mei it weidlân, Debir, mei it weidlân, ₁₆Ajin mei it weidlân, Jûtta mei it weidlân en Bet-Sjêmesj mei it weidlân. Njoggen stêden út dy twa stammen. ₁₇Ut ’e stam Benjamin: Gibeön mei it weidlân, Gebe mei it weidlân, ₁₈Anatot mei it weidlân en Almon mei it weidlân, fjouwer stêden. ₁₉It tal stêden mei it weidlân fan ’e Aäroniten, de prysters, mei-inoar wienen trettjin.

₂₀De famyljes fan ’e Kehatiten dy’t Leviten wienen, dat binne de oare Kehatiten, lotten stêden út ’e stam fan Efraïm. ₂₁Oan har joegen se de frijstêd foar de deaslaggers, Sichem, mei it weidlân, op it berchlân fan Efraïm; fierder Gêzer mei it weidlân. ₂₂Kibsajim mei it weidlân en Bet-Choaron mei it weidlân; fjouwer stêden. ₂₃Fierder út ’e stam Dan: Elteké mei it weidlân, Gibbeton mei it weidlân, ₂₄Ajjalon mei it weidlân en Gat-Rimmon mei it weidlân; fjouwer stêden. ₂₅Ut ’e heale stam fan Manasse Taänak mei it weidlân en Gat-Rimmon mei it weidlân; twa stêden. ₂₆Mei-inoar tsien stêden mei it weidlân foar de famyljes fan ’e oare Kehatiten.

₂₇De Gersjoniten, dy’t ta de famyljes fan ’e Leviten hearden, krigen út ’e heale stam fan Manasse de frijstêd foar de deaslaggers Golan yn Bazan mei it weidlân en Beësjtera mei it weidlân; twa stêden. ₂₈Fierder út ’e stam Issaskar Kisjon mei it weidlân, Dobrat mei it weidlân, ₂₉Jarmût mei it weidlân en En-Gannim mei it weidlân; fjouwer stêden. ₃₀Ut ’e stam Azer Misjal mei it weidlân, Abdon mei it weidlân, ₃₁Chelkat mei it weidlân en Rechob mei it weidlân; fjouwer stêden. ₃₂Ut ’e stam Naftaly de frijstêd foar de deaslaggers Kêdesj yn Galiléa mei it weidlân; fierder Chammot-Dor mei it weidlân en Karten mei it weidlân; trije stêden. ₃₃It tal stêden mei it weidlân fan ’e Gersjoniten neffens har famyljes mei-inoar trettjin.

₃₄De famyljes fan ’e Mearariten, de oare Leviten, krigen út ’e stam Sebûlon

Jokneäm mei it weidlân, Karta mei it weidlân, ₃₅Dimna mei it weidlân en Nahalal mei it weidlân; fjouwer stêden. ₃₆Ut ’e stam Rûben: Bêser mei it weidlân, Jasa mei it weidlân. ₃₇Kedemot mei it weidlân en Mefaät mei it weidlân; fjouwer stêden. ₃₈Ut ’e stam Gad de frijstêd foar de deaslaggers Ramot yn Gileäd mei it weidlân, Machanajim mei it weidlân, ₃₉Chesbon mei it weidlân en Jazer mei it weidlân. Mei-inoar fjouwer stêden. ₄₀Al dy stêden wienen foar de oare famyljes fan ’e Leviten, dy fan Merary. Dy har lot bestie út tolve stêden. ₄₁It tal stêden mei it weidlân fan ’e Leviten, midden yn ’e gerjochtichheid fan ’e Israeliten wienen mei-inoar acht en fjirtich. ₄₂Al dy stêden wienen stik foar stik mei it weidlân dêromhinne. Sa wie it mei al dy stêden.

₄₃Sa joech de Heare oan Israel it hiele lân, dat Er mei in eed oan har foarfaars tasein hie. Hja hawwe it yn besit nommen en har dêr nei wenjen set. ₄₄De Heare joech har oan alle kanten rêst, alhiel sa’t Er har foarfaars mei in eed tasein hie. Gjinien fan al har fijannen koe it tsjin har hâlde: al har fijannen hat de Heare har yn ’e macht jûn. ₄₅Alle goede beloften fan de Heare oan it folk fan Israel, is gjin wurd fan ferfallen. It is allegearre neikommen.