Hebreeërs 5

₁Want elke hegepryster wurdt keazen út ’e minsken en oansteld foar (de) minsken yn ’e tsjinst fan God om jeften en offers te bringen foar de sûnden. ₂Om’t er sels mei swakheden oanhelle is, kin hy der ynkomme as minsken ûnwittend en op ’e doele binne. ₃En om dy swakkens moat er ek net allinnich foar de sûnden fan it folk offers bringe, mar krektlikegoed foar syn eigen. ₄En net ien eigenet himsels dat earfolle amt ta, mar jo moatte dêr ta roppen wurde, lykas Aäron. ₅Sa hat ek de Kristus net Himsels de eare jûn fan hegepryster te wurden; dat hat God dien, dy’t tsjin Him sein hat:

₆Sa seit Er ek op in oar plak:

₇Yn ’e dagen fan syn libben op ierde hat Er mei lûd gerop en triennen gebeden en smekings opdroegen oan Him dy’t Him fan ’e dea ferlosse koe. En om syn frommens is Er ferheard. ₈En yn dy wei hat Er, al wie Er de Soan fan God sels, troch syn lijen leard om Him ûnder God del te jaan. ₉Doe’t Er folslein wurden wie, is Er boarne fan ivich behâld wurden foar allegearre dy’t nei Him harkje, ₁₀mei’t Er troch God útroppen wie as hegepryster op ’e wize fan Melchisédek.

₁₁Oer dizze saak hawwe wy hiel wat te sizzen, mar it is min út te lizzen om’t jimme sa staf wurden binne. ₁₂Jimme hienen ommers nei sa’n lange tiid sels al learmasters wêze moatten, mar jimme hawwe wer ferlet fan ien dy’t jimme de earste lessen fan Gods boadskip bybringt. It is safier kommen, dat jim moatte wer oan ’e flesse en kinne net fan ’e tafel mei-ite. ₁₃Wa’t oan ’e flesse is, is in lyts bern en hat gjin weet fan ’e rjochte lear. ₁₄Fan ’e tafel mei-ite lykwols kinne grutten, dy’t oefene binne en sa opskerpe fermogens hawwe om goed en kwea te ûnderskieden.