Genesis 11

₁Alle minsken hienen ien taal en brûkten deselde wurden. ₂Wylst se it easten yn trieken, fûnen se in leechflakte yn it lân Sjineär en dêr setten se har nei wenjen. ₃Doe seinen se tsjin inoar: Kom! Lit ús tichelstien meitsje en dy goed trochbakke. De tichelstien wie har boustien en it asfalt wie har speesje. ₄En hja seinen: Kom! Lit ús in stêd bouwe mei in toer dêr’t de spits fan yn ’e himel rikt en lit ús ússels in namme meitsje. Oars koenen wy ris fersille reitsje, de hiele ierde oer. ₅Doe kaam de Heare del om de stêd en de toer dy’t de minskebern makke hienen, te besjen. ₆En de Heare sei: Sjoch, hja binne ien folk en hawwe allegearre ien taal. Wat se no dogge, is noch mar in begjin; skielk sil har neat mear ûnmooglik wêze fan alles dat se fan doel binne. ₇Kom, lit ús delkomme en dêr har taal betiizje, dat de iene de oare syn taal net mear ferstean kin. ₈Sa ferstruide de Heare har dêrwei de hiele ierde oer en hja hâlden op mei de stêd te bouwen. ₉Dêrom wurdt dy stêd Babel neamd. De Heare hat dêr ommers de taal fan ’e hiele ierde betiisd en dêrwei hat de Heare har de hiele ierde oer ferstruid.

₁₀Dit is it neigeslacht fan Sem: Sem wie 100 jier, doe’t er Arpachsjad krige, twa jier nei de floed. ₁₁Sem libbe, neidat er Arpachsjad krige hie, noch 500 jier en hy krige soannen en dochters. ₁₂Arpachsjad wie 35 jier doe’t er Sjêlach krige. ₁₃Arpachsjad libbe, neidat er Sjêlach krige hie, noch 403 jier en hy krige soannen en dochters. ₁₄Sjêlach wie 30 jier en doe krige er Eber. ₁₅Sjêlach libbe, neidat er Eber krige hie, noch 403 jier en hy krige soannen en dochters. ₁₆Eber wie 34 jier en doe krige er Pêleg. ₁₇Eber libbe, neidat er Pêleg krige hie, noch 430 jier en hy krige soannen en dochters. ₁₈Pêleg wie 30 jier en doe krige er Reû. ₁₉Pêleg libbe, neidat er Reû krige hie, noch 209 jier en hy krige soannen en dochters. ₂₀Reû wie 32 jier en doe krige er Serûg. ₂₁Reû libbe, neidat er Serûg krige hie, noch 207 jier en hy krige soannen en dochters. ₂₂Serûg wie 30 jier en doe krige er Nachor. ₂₃Serûg libbe, neidat er Nachor krige hie, noch 200 jier en hy krige soannen en dochters. ₂₄Nachor wie 29 jier en doe krige er Têrach. ₂₅Nachor libbe, neidat er Têrach krige hie, noch 119 jier en hy krige soannen en dochters. ₂₆Têrach wie 70 jier en doe krige er Abram, Nachor en Haran.

₂₇Dit is it neigeslacht fan Têrach: Têrach krige Abram, Nachor en Haran, en Haran krige Lot. ₂₈Haran stoar noch by syn heite libben yn syn heitelân yn Oer, de stêd fan ’e Chaldeeërs. ₂₉Abram en Nachor trouden. De frou fan Abram hiet Sarai en dy fan Nachor Milka, dochter fan Haran, de heit fan Milka en Jiska. ₃₀No wie Sarai ûnfruchtber; hja krige gjin bern. ₃₁Têrach naam syn soan Abram, en Lot, de soan fan Haran, syn bernsbern en Sarai, syn skoandochter, Abram syn frou, mei en hja gongen mei-inoar út Oer, de stêd fan ’e Chaldeeërs om nei it lân Kanaän te gean. Doe’t se yn Charan oankommen wienen, bleauwen se dêr. ₃₂Têrach is 205 jier wurden; doe is er stoarn te Charan.