Ezra 10

₁Doe’t Ezra oan it bidden wie en skriemend skuld belied en dêrby foar it hûs fan God delfoel, joech in grutte smite folk út Israel har by him: manlju, froulju en bern. Dat die wol bliken út it lûde gûlen fan it folk. ₂Doe naam Sjekanja, de soan fan Jechiël, ien út ’e neiteam fan Elam, it wurd en sei tsjin Ezra: Wy hawwe ús God ûntrou west troch frjemde froulju by ús te nimmen út de befolking fan it lân. Likegoed is der noch in lytse hope foar Israel. ₃Wy moatte ús no mei-inoar ferbine foar ús God, dat wy sokke froulju allegearre fuortstjoere mei de bern fan har, sa’t de Heare en hja dy’t ûntsach hawwe foar it gebod fan ús God, dat hawwe wolle. Lit der dochs dien wurde neffens de wet! ₄Oerein, want it komt foar jo op! Wy steane njonken jo! Meitsje in man út! Meitsje risselwaasje!

₅Doe gong Ezra oerein. Hy liet de foaroanmannen fan ’e prysters, de leviten en hiele Israel swarre, dat se neffens dat wurd dwaan soenen en dat dienen se. ₆Dêrnei gong Ezra foar it hûs fan God wei en bejoech him nei de keamer fan Jochanan, soan fan Eljasjib. Doe’t er dêr hinnegien wie, iet er gjin brea en dronk er gjin wetter, want hy roude oer de troubrek fan ’e ballingen.

₇Der waard in oprop yn Juda en Jeruzalem rûnstjoerd oan alle ballingen om yn Jeruzalem byinoar te kommen. ₈De foaroanmannen en de âldsten wienen oerienkommen, dat wa’t der binnen trije dagen net wie, al syn hawwen en hâlden soe de ban op lein wurde en hysels soe út de gearkomste fan ’e ballingen set wurde. ₉Doe kaam alleman út Juda en Benjamin binnen trije dagen yn Jeruzalem byinoar. It wie yn ’e njoggende moanne, op de tweintichste dêrfan. En it hiele folk siet te rydboskjen op it plein fan it hûs fan God fanwegen dy saak en tagelyk om’t it reinde dat it easde. ₁₀Dêr gong pryster Ezra oerein en sei tsjin it folk: Jimme hawwe de trou brutsen troch frjemde froulju by jimme te nimmen. Dêrmei hawwe jimme de skuld fan Israel noch grutter makke. ₁₁Mar bring no de Heare, de God fan jimme âffaars, eare ta; doch wat Him nei ’t sin is en haw gjin gedoente mei de befolking fan it lân en de frjemde froulju.

₁₂De hiele gearkomste fan it folk antwurde ferheftich: Ja, wy sille dwaan krekt sa’t jo sizze. ₁₃Der binne lykwols safolle minsken en it is yn ’e wiete rite, men kin net bûtendoar stean bliuwe. It wurk kin ek net-yn ien dei besljochte wurde, ek net yn twa. Dêrfoar hawwe hjiryn tefolle ôffallich west. ₁₄Lit de foaroanmannen foar de hiele gearkomste yn ’t spier gean. En litte allegearre yn ús stêden dy’t frjemde froulju nommen hawwe, ien foar ien komme, op ’e fêststelde tiden. En mei har de âldsten, stêd foar stêd, en de rjochters dêrwei. Mochten wy sa de gleone grime fan ús God oer dizze saak fan ús ôfkeare!

₁₅Allinne Jonatan, de soan fan Asahel en Jachzeja, de soan fan Tikwa, iggewearren dêr tsjinyn en Mesjûllam mei Sjabbetai, de levyt, stipen har. ₁₆Mar de ballingen dienen sa. Doe waarden apart set: pryster Ezra mei manlju, famyljehaden, elk foar syn eigen stamhûs, allegearre mei namme en tanamme. Hja hâlden de earste deis fan ’e tsiende moanne sitting om de saak te ûndersykjen. ₁₇De earste deis fan ’e earste moanne wienen se mei alle manlju dy’t frjemde froulju by har nommen hienen, klear.

₁₈Under de prystersoannen dy’t frjemde froulju by har nommen hienen, troffen se oan út ’e neiteam fan Jesjûa en syn bruorren, soannen fan Josadak: Maäséja, Eliêzer, Jarib en Gedalja. ₁₉Hja joegen de hân derop dat se har froulju fuortgean litte soenen; en om’t se skuldich stienen, joegen se in raam út it lytsfee foar har skuld. ₂₀Fan ’e soannen fan Immer wienen it: Chanany en Sebadja; ₂₁fan ’e soannen fan Charim: Maäséja, Elía, Sjemaja, Jechiël en Oezia; ₂₂fan ’e soannen fan Pasjchûr: Eljoënai, Maäséja, Jisjmael, Netanel, Jozabad en Elasa.

₂₃Fan ’e leviten: Jozabad, Sjimy en Kelaja, dat is Kelita, Petachja, Jehûda en Eliêzer.

₂₄Fan ’e sjongers: Eljasjib; en fan ’e poartewachters: Sjallûm, Telem en Oery.

₂₅Ut Israel wienen it: fan ’e soannen fan Parosj: Ramja, Jizzia, Malkía, Miamin, Elazar, Malkia en Benaja; ₂₆fan ’e soannen fan Elam: Mattanja, Sekarja, Jechiël, Abdy, Jeremot en Elias; ₂₇fan ’e soannen fan Sattû: Eljoënai, Eljasjib, Mattanja, Jeremot, Sabad en Aziza; ₂₈fan ’e soannen fan Bebai: Jehochanan, Chananja, Sabbai en Atlai; ₂₉fan ’e soannen fan Bany: Mesjûllam, Mallûk en Adaja, Jasjûb en Sjeäl, Jeramot; ₃₀fan ’e soannen fan Pachat-Moäb: Adna en Kelal, Benaja, Maäséja, Mattanja, Besalel, Binnûi en Menassjé; ₃₁fan ’e soannen fan Charim: Eliêzer, Jissjia, Malkia, Sjemaja, Sjimon, ₃₂Benjamin, Mallûk en Sjemarja; ₃₃fan ’e soannen fan Chasjûm: Mattenai, Mattatta, Sabad, Elifêlet, Jeremai, Menasjé en Sjimy; ₃₄fan ’e soannen fan Bany: Maädai, Amram, Oeël, ₃₅Benaja, Bedeja, Kelûhû; ₃₆Wanja, Meremot, Eljasjib, ₃₇Mattanja, Mattenai en Jaäsai, ₃₈Bany, Binnûi, Sjimy, ₃₉Sjêlemja, Natan, Adaja, ₄₀Maknadbai, Sjasjai, Sjarai, ₄₁Azarel, Sjêlemja, Sjemarja, ₄₂Sjallûm, Amarja en Joazef; ₄₃fan ’e soannen fan Nebo: Jeiël, Mattitja, Sabad, Sebina, Jaddai, Joël en Benaja. ₄₄Dy hienen allegearre frjemde froulju nommen. Der wienen ûnder harren ek guon mei froulju dêr’t se bern by krige hienen.