2 Tessaloníkers 1

₁Fan Paulus, Silvanus en Timóteüs. Oan ’e gemeente fan Tessaloníka, dy’t mei God ús Heit en de Hear Jezus Kristus ferbûn is. ₂Genede en frede mei jimme jûn wurde fan God de Heit en de Hear Jezus Kristus.

₃Bruorren, wy fiele ús ferplichte om God aloan foar jimme te tankjen. En dêr is alle reden ta, want jimme leauwen wint tige oan en de leafde foar elkoar fan elk fan jimme allegearre wurdt almar grutter. ₄Dat wysels sprekke fan jimme yn ’e gemeenten fan God, om’t jimme leauwen hoekhâldt yn alle ferfolgings en benearings dy’t jimme te ferduorjen hawwe. ₅Dat wiist op Gods rjochtfeardich oardiel: sa wurde jimme it keninkryk fan God weardich achte, dêr’t jim no foar lije. ₆Want dat is sûnder mis rjocht neffens God: dy’t jimme lije litte, sil Hy yn it lijen bringe. ₇Mar jimme dy’t lije moatte, sil Er tagelyk mei ús ferromming jaan, as ús Hear Jezus Kristus út ’e himel wei ferskynt mei syn machtige ingels, ₈yn in lôgjend fjoer. Dan sil Hy straffe dy’t om God noch syn gebod net jouwe en dy’t net harkje wolle nei it bliid boadskip fan ús Hear Jezus. ₉Sy sille as straf in ivich ferdjer krije, fier fan it antlit fan de Hear en fan syn hearlike macht, ₁₀as Hy komt om ferhearlike te wurden yn al syn hilligen en bewûndere ûnder allegearre dy’t ta it leauwen kommen binne – en ús tsjûgenis by jimme is deryn gien –. Sa sil it gean op dy grutte dei.

₁₁Mei dat doel bidde wy ek aloan foar jimme, dat ús God oardielje mei dat jimme libje sa’t it roppenen past. Mei Hy troch syn macht jimme nocht oan it goede en it yn praktyk bringen fan jimme leauwen folslein meitsje. ₁₂Dan sil de namme fan ús Hear Jezus Kristus yn jimme ferhearlike wurde en jimme yn Him, troch de genede fan ús God en Hear Jezus Kristus.