1 Timoteüs 4

₁Mar de Geast seit mei klam, dat der yn letter tiden guon minsken fan it leauwen ôffalle sille, om’t se har ôfjouwe mei dwaalgeasten en duvelske learingen, ₂troch de skynhilligens fan leagensprekkers dy’t yn har gewisse it brânmerk drage. ₃Se ferbiede it trouwen en it iten fan spizen, dy’t God dochs skepen hat, dat se mei tanksizzing brûkt wurde sille troch minsken dy’t leauwe en de wierheid kennen leard hawwe. ₄Want alles wat God skepen hat, is goed en dêr is neat fan te fersmiten, as men it mar mei tanksizzing oannimt; ₅want it wurdt hillige troch it wurd fan God en it gebed.

₆Asto dat oan ’e bruorren foarhâldst, dan bisto in goede feint fan Kristus Jezus, ien foar wa’t de wurden fan it leauwen en fan ’e goede leare, dêrsto dy by oansletten hast, iten en drinken binne. ₇Mar fersmyt de ûnhillige âldwivefabels. Oefenje dysels deryn om from te libjen. ₈Want it ynbinen fan it lichemsferlet hat net safolle nut, mar de foardielen fan ’e godsfreze komt gjin ein fan: want dêr leit de belofte yn fan libben, fan it tsjintwurdige likegoed as fan it takomstige. ₉Dat is in wier wurd en folslein oannimlik. ₁₀Want dat is it doel fan ús bodzjen en striden, om’t wy ús hope set hawwe op de libbene God, dy’t in Ferlosser is fan alle minsken, benammen fan har dy’t leauwe. ₁₁Dat moatsto har ynskerpje en leare.

₁₂Gjinien mei op dy delsjen omdatsto noch sa jong bist, mar wês in foarbyld foar har dy’t leauwe, yn dyn wurden, dyn hâlden en dragen, yn leafde, leauwen en foechsumens. ₁₃Oant ik sels kom, moatsto dy aloan útlizze op it foarlêzen fan ’e Skrift, op it fermoanjen en it ûnderrjochtsjen. ₁₄Lit de genedejefte dy’t yn dy is, net ferwurde. Dy hast troch in profetewurd krige, wylst de âldsten mei-inoar dy de hannen opleinen. ₁₅Do moatst dy dingen goed neigean en deryn libje, dan sil it alleman opfalle hoesto oanwinst. ₁₆Stean noed fan dyn hâlden en dragen en fan watsto de minsken learst. Hâld dat beide fêst. Asto dat dochst silsto dysels en likegoed har dy’t nei dy harkje behâlde.