1 Petrus 4

₁Om’t no Kristus mei syn ierdsk bestean lit hat, moatte jimme jimsels ek wapenje mei itselde betinken: want dy’t mei syn ierdsk bestean lit hat, dy hat ôfdien mei de sûnde. ₂Sa’n ien besteget de tiid dy’t him op ierde noch jûn wurdt, net mear oan minsklike begearten mar oan wat God wol. ₃Jim hawwe yn ’t foarige al genôch tiid ferdien mei te dwaan wat de heidens foarhawwe. Doe slieten jimme jim libben yn lossens, hertstochten en dronkenskip, yn sûpen en setten en skandlike ôfgoaderij. ₄En no hawwe se der niget oan, dat jimme jim net mear mei harren stoarte yn dy stream fan liderlikens en meitsje se jimme min. ₅Mar se sille dêr rekkenskip fan jaan moatte oan Him dy’t ree stiet om libbenen en deaden te oardieljen. ₆Want dêrom is ek oan minsken dy’t no al stoarn binne, it bliid boadskip brocht, dat sy wol, as alle minsken, oardiele wurde soenen nei it lichem, mar dochs, lykas God, nei de geast libje soenen.

₇De ein fan alle dingen stiet foar de doar. Wês dêrom ferstannich en sober om bidde te kinnen. ₈Foar alles moatte jimme inoar oanienwei leafhawwe, want de leafde sljochtet in mannichte fan sûnden oer. ₉Wês gastfrij foar inoar sûnder te krimmenearjen. ₁₀Tsjinje elkoar, in elk nei de jefte dy’t er krige hat, as goede rintmasters fan Gods mannichfâldige genede. ₁₁Wa’t sprekt, moat wurden fan God bringe; wa’t oaren helpt, moat dat dwaan mei de krêft dy’t God jout. Sa mei God yn alles ferhearlike wurde troch Jezus Kristus, fan wa’t de hearlikheid en de macht is foar ivich en altiten. Amen.

₁₂Bêste freonen, haw gjin niget oan ’e fjoergloede dy’t oer jimme kommen is om jimme te lotterjen. Wat jimme treft, is wat hiel gewoans. ₁₃Mar wês leaver bliid dat jimme sa oandiel hawwe yn it lijen fan Kristus. Dan sille jimme ek jubelje fan blidens, as syn hearlikheid iepenbiere wurdt. ₁₄As jimme ferhúnd wurde om’t jimme nei Kristus neamd binne, wat in gelok foar jimme: Want dat hâldt yn dat de Geast dy’t hearlikheid jout, op jimme rêst: de Geast fan God.

₁₅Mar dan moat fansels ek net ien fan jimme lije as in moardner, in dief, in misdiediger of in oproermakker. ₁₆Wannear’t lykwols ien fan jimme lije moat om’t er kristen is, dan hoecht er him dêr net foar te skamjen. Lit him leaver God ferhearlikje, om’t er dy namme draacht. ₁₇Want it is no safier hinne, dat it oardiel begjint – en wol by Gods eigen folk –. Mar as it by ús begjint, hoe sil it dan ôfrinne mei har dy’t net nei Gods bliid boadskip harkje wolle? ₁₈En:

₁₉Dêrom moatte sy dy’t lije om’t God it wol, harsels tabetrouwe oan har Skepper, dy’t stiet by syn wurd, en trochgean mei it goede te dwaan.