1 Keningen 4

₁Sa wie kening Salomo kening oer hiele Israel. ₂Dit wienen syn hege amtners: Azarja, de soan fan Sadok, wie de pryster. ₃Elichoaref en Achía, soannen fan Siza, wienen griffier. Josjafat, de soan fan Achilûd, wie kânselier. ₄Benaja, de soan fan Jojada, stie oer it leger. Sadok en Abjatar wienen pryster. ₅Azarja, de soan fan Natan, wie haad fan ’e steedhâlders. Sabûd, de soan fan pryster Natan, wie freon fan ’e kening. ₆Achisjar gong oer it paleis en Adoniram, de soan fan Abda, oer de hearetsjinsten.

₇Salomo hie ek noch tolve steedhâlders oer hiele Israel. Dy moasten de kening en syn hûs ûnderhâlde; elke moanne fan it jier hie ien fan har de fersoarging. ₈Har nammen wienen: Ben-Chûr yn it berchlân fan Efraïm. ₉Ben-Dêker yn Makas, Sjaälbim, Betsjêmesj, Ajalon en Bet-Chanan. ₁₀Ben-Chêsed yn Arûbot hie Soko en it hiele lân Chefer. ₁₁Ben-Abinadab yn ’e hiele kontrei fan Dor. Tafat, de dochter fan Salomo, wie syn frou. ₁₂Baäna, Ben-Achilûd, hie Taänak en Megiddo en hiele Betsjeän njonken Saretan ûnder Jizreël, fan Betsjeän oant Abelmehola, Jokmeän foarby. ₁₃Ben-Gêber yn Ramot-Gileäd; hy hie de tintekampen fan Jaïr, de soan fan Manasse, dy’t yn Gileäd lizze; hy hie ek de streek Argob yn Bazan, sechstich grutte wenplakken mei muorren en slútbalken. ₁₄Achinadab, soan fan Iddo, yn Mahanaïm. ₁₅Achimaäs yn Naftaly. Dy hie ek in dochter fan Salomo, Basemat, as frou. ₁₆Baänna, soan fan Chasai, yn Azer en Alot. ₁₇Josafat, soan fan Parua, yn Issaskar. ₁₈Simeï, soan fan Ela, yn Benjamin. ₁₉Gêber, soan fan Oery, yn it lân Gad; dat is it lân fan Sjichon, kening fan ’e Amoriten en Og, kening fan Bazan. En dan noch ien steedhâlder yn it lân fan Juda. ₂₀Israel wie sa machtich as it sân by de see. De minsken ieten en dronken en hienen alle wille.