1 Kroniken 5

₁De neiteam fan Rûben, Israel syn earstlingssoan. Hy wie wol de earstlingssoan, mar om’t er it bêd fan syn heit skeind hat, is syn rjocht fan earstlingssoan oan de soannen fan Joazef, de soan fan Israel, jûn. Mar dy koe net yn it famyljeregister ynskreaun wurde as earstlingssoan; ₂want Juda wie de machtichste ûnder syn bruorren en út him is in foarst opkommen, al hie Joazef dan it rjocht fan earstlingssoan krige. ₃De soannen fan Rûben, Israel syn earstlingssoan, wienen Chanok en Pallû, Chesron en Karmy. ₄De soannen fan Joël: syn soan Sjemaja, dy syn soan Gog, dy syn soan Sjimy; ₅dy syn soan Mika, dy syn soan Reäja, dy syn soan Baäl; ₆dy syn soan Beëara; dy is troch Tillegat-Pilnêser, de kening fan Assyrië, yn ballingskip fuortfierd; hy wie in foarman fan ’e Rûbeniten.

₇Syn bruorren mei har geslachten, sa’t se nei har komôf yn ’e famyljeregisters ynskreaun waarden, wienen Jeïel, de oanfierder, en Sekarja, ₈en Bêlam, de soan fan Azas, de soan fan Sjêma, de soan fan Joël. Dy wenne yn Aroër en oan de Nebo en Baäl-Méon ta. ₉Op it easten rûn syn wenplak oan ’e râne fan ’e woestyn ta, diskant de rivier de Eufraat; want se hienen in soad fee yn it lân Gileäd. ₁₀Yn ’e dagen fan Saul fierden se oarloch mei de Hagriïten; dy foelen troch har hân. Sa kamen sy yn dy har tinten te wenjen, de hiele eastkant fan Gileäd lâns.

₁₁De soannen fan Gad wennen foar harren oer yn it lân Bazan oan Salka ta. ₁₂Joël wie de oanfierder, Sjafan de twadde, dan Janaï en Sjafat yn Bazan. ₁₃Har bruorren mei har stamhuzen wienen: Mikaël, Mesjûllam, Sjêba, Joarai, Jaëkan, Sia en Eber, sân. ₁₄Dat wienen de soannen fan Abichaïl, de soan fan Choery, de soan fan Jaroäch, de soan fan Gileäd, de soan fan Mikaël, de soan fan Sjisjai, de soan fan Jachdo, de soan fan Bûs. ₁₅Achy, de soan fan Abdiël, de soan fan Gûny, wie it haad fan har stamhûs. ₁₆Se wennen yn Gileäd, yn Bazan en de plakken dy’t dêrûnder foelen en yn alle greiden fan Sjaron sa fier’t dy mar rûnen. ₁₇Dy allegearre binne yn ’e famyljeregisters ynskreaun yn ’e dagen fan kening Jotam fan Juda en yn ’e dagen fan kening Jerobeäm fan Israel.

₁₈De soannen fan Rûben, de Gaditen en de heale stam Manasse hienen 44.760 tsjinstplichtigen, striidbere mannen, dy’t skyld en swurd drage en bôgespanne koenen en yn it fjochtsjen ûnderlein wienen. ₁₉Se fierden oarloch tsjin de Hagriïten, Jetûr, Nafisj en Nodab; ₂₀en krigen safolle help, dat de Hagriïten en al har meistanners foelen har yn hannen. Want yn ’e striid rôpen se God oan, en Hy liet Him fan har ferbidde, om’t se op Him betrouden. ₂₁Se fierden it fee fan ’e Hagriïten fuort: 50.000 fan har kamielen, 250.000 skiep en 2000 ezels; en oan minsken 200.000 man. ₂₂Want der wienen gâns dearekke, om’t God de striid besljochte. Sa kamen se op dy lju har plak te wenjen oan ’e ballingskip ta.

₂₃De neiteam fan ’e heale stam Manasse wenne yn it lân dat rint fan Bazan ôf oan Baäl-Hermon, de Senir en de berch Hermon ta. Hja wienen wit-hoe-machtich. ₂₄Dit wienen de haden fan har stamhuzen: Efer, Jisjy, Eliël, Azriël, Jirmeja, Hodawja en Jachdiël; sterke striidbere mannen, ferneamde mannen, haden fan har stamhuzen.

₂₅Mar se waarden de God fan har foarfaars ûntrou en huorken achter de goaden fan ’e folken fan it lân oan, dy’t God foar har eagen ferdylge hie. ₂₆Dêrom sette Israels God kening Pûl fan Assyrië, te witten – Tillegat-Pilnêser fan Assyrië tsjin harren op, dat dy fierde harren de ballingskip yn: de Rûbeniten, de Gaditen en de heale stam Manasse; en hy brocht harren nei Chalach, Chabor, Hara en nei de rivier de Gozan, dêr’t se oant hjoed-de-dei tahâlde.

₂₇De soannen fan Levy wienen Gersjom, Kehat en Merary. ₂₈De soannen fan Kehat wienen Amram, Jishar, Chebron en Oezziël. ₂₉De bern fan Amram wienen Aäron, Mozes en Mirjam. De soannen fan Aäron wienen Nadab en Abihû, Eleäzar en Itamar.

₃₀Eleäzar wie de heit fan Pinechas; Pinechas fan Abisjûa. ₃₁Abisjûa fan Bûky; Bûky fan Oezzy. ₃₂Oezzy fan Serachja; Serachja fan Merajot. ₃₃Merajot fan Amarja; Amarja fan Achitûb. ₃₄Achitûb wie de heit fan Sadok, Sadok fan Achimaäs, ₃₅Achimaäs fan Azarja, Azarja fan Jochanan, ₃₆Jochanan fan Azarja; dat wie de man dy’t de prystertsjinst die yn it hûs dat Salomo boude. ₃₇Azarja wie de heit fan Amarja, Amarja fan Achitûb, ₃₈Achitûb fan Sadok, Sadok fan Sjallûm, ₃₉Sjallûm fan Chilkía, Chilkía fan Azarja, ₄₀Azarja fan Seraja, Seraja fan Jósadak. ₄₁Jósadak moast mei, doe’t de Heare Juda en Jeruzalem yn ballingskip brocht troch de macht fan Nebûkadnessar.